曾江逝世︳染髮廣告成經典 一個失誤「被代言」幾十年

資深演員曾江日前外遊回港後，於酒店隔離檢疫期間猝逝，終年87歲。曾江縱橫影視圈多年，不少角色都演得淋漓盡致，但論到最深入民心，可能係播足幾十年嘅染髮廣告，幾代人都睇過！

原來因為曾江一時失手，令呢個「經典之作」播足咁多年，但只係收到一次片酬。

話說呢個廣告80年代拍攝，當時嘅合約唔似而家咁，會訂明播放期限以保障拍攝藝人，又或者過咗期限客戶就要再俾錢，以免藝人收一次錢就俾條廣告個客播一世。但係曾江簽約時無留意呢一點，而嗰個染髮品牌又唔介意80年代低清拍攝嘅廣告，畫質隨住電視解像度上升而變濛，用足幾十年！甚至用後製將原版2位「白頭」演員換成2位女士，當成新片出街。而曾江因此變相收一次錢就做足咁多年代言，蝕晒大本。

2013年，曾江拍咗另一個染髮劑廣告，裡面有人問曾江「你仲用緊嗰隻染髮？」，擺明抽水。之後同一品牌再搵曾江搭方中信拍廣告，曾江嘅對白更加暗寸以前嗰隻染髮劑「黑到好似戴假髮」！

而本身曾江「代言」多年嗰隻染髮劑，幾年前搵咗古天樂做代言人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！