【老婆Yoyo無份】有指豪宅贈母轉軚 王浩信榮升業主

想知嗰個人係唔係乖仔乖女，最簡單就係睇佢對自己父母有幾好。而做一個好老公好老婆，好多人都話係睇你可以放下自己身段對佢有幾愛錫，捨得用金錢去哄對方開心。王浩信（Vincent）近年備受無綫力捧，好多劇集都擔任男主角。喺2017年，佢喺《踩過界》中飾演嘅盲人大律師文申俠，除咗角色大受歡迎之外，佢仲憑角色榮升視帝。另外，佢主演嘅台慶劇《解決師》亦正在熱播中。

做得視帝，工作當然越來越忙，咁搵嘅錢就越來越多。喺上年年中，王浩信以3306.6萬港元購入位於清水灣嘅1800呎豪宅，首次做業主。原本佢就話層樓係送俾自己媽咪，不過今日有報道指喺正式簽樓契嘅時候，突然用咗佢自己嘅真名 － 王昊做業主，而且仲要係佢個人單獨持有，並冇加媽咪同老婆陳自瑤YoYo個名。之前王浩信曾經講過話佢同老婆傾過，買完樓俾媽咪，之後先買俾佢，睇嚟YoYo仲要等多一陣啦！

喺上年年尾，王浩信同YoYo婚姻危機鬧得熱烘烘，當時佢哋仲跟好友伍允龍返教會做婚姻輔導，希望尋求心靈輔導得到幫助修補段婚姻。睇返YoYo嘅IG，佢喺呢幾日就上載性感泳衣相，並留言話一心一意做好自己，莫非有所暗示？