期望太大 驚連累MIRROR Anson Lo出歌壓力爆煲 隊雪糕自救

·2 分鐘文章
Anson Lo自覺年資尚淺,冇資格劍指男歌手獎。
Anson Lo自覺年資尚淺,冇資格劍指男歌手獎。

被封「百萬歌手」的Anson Lo,錄製新歌期間壓力爆煲,放肆大擦雪糕放題減壓。他自爆兒時愛駁嘴的曳事,結果換來媽咪體罰的大教訓!

人氣男團MIRROR成員Anson Lo的跳唱新歌《Megahit》在網上公開,火速衝破百萬點擊,原來他於新歌推出前緊張得壓力爆煲,因為他太鍾意首歌,期望太大,有時會自責做得未夠好,錄音時又驚高音唱不到,加上MV準備時間不足,種種壓力令他變得「騰雞」,擔心打亂MIRROR的出歌計劃,最終靠「喪食」減壓,他說:「嗰陣我一次食2、3支雪條或雪糕,畀自己放縱吓!」

駁嘴駁舌捱打

媽咪是Anson Lo的傾訴對象,他形容媽咪是其「最強後盾」,也是心靈上的經理人。他大爆媽咪最愛攻擊他的弱點:「我每個訪問、演出,佢都會同我檢討,講好多看似殘忍、令人好唔舒服嘅評論,但我已經習慣,因為我好信任媽咪嘅意見,好多時都會搵佢幫手解決問題。」他自爆小時候會跟媽咪頂嘴,結果換來「大懲罰」,他說:「入到房跪低,媽咪會攞把好長嘅木間尺打我手板,大個就知頂嘴唔啱,其實媽咪都係緊張自己。」

新歌講述人與人之間難免有衝突,正好反映他與經理人花姐的溝通,他指雙方的睇法與價值觀很多時不同,但會理性分析及討論:「可能碰碰撞撞會有啲新嘅驚喜、花火。(吵大鑊?)都會㗎!試過太坦白同佢講嘢,令佢嬲咗幾日,但雙方都係為件事好。」問到年底樂壇頒獎禮,可期望攞男歌手獎?他自嘲:「我完全冇諗過自己有資格做呢樣嘢,唔係謙虛,我年資淺到咁,等我儲多啲作品先諗其他嘢。」

新歌呢個「Uh-Oh」手勢,冇Fans唔識啦!
新歌呢個「Uh-Oh」手勢,冇Fans唔識啦!



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能