未上擂台就開拖?霍哥同周永恆記招大打出手 一個手勢惹「做戲」疑團
曾經主辦拳賽同林作對打嘅鍾培生,將於今年11月舉辦另一場拳賽,重頭戲係由剛剛退出微辣嘅霍哥(霍俊邦),大戰娛圈負皮王周永恆。拳賽記者會今日舉行,係霍哥自微辣前經理人阿晶逝世後首次現身,結果佢同周永恆記招上大打出手!
通常拳賽記者會都有對陣雙方拳手面對面嘅faceoff影相位環節,有時甚有火藥味,今次都唔例外。片段所見,周永恆喺呢個環節不時對高佢半個頭、身高6呎5嘅霍哥冷笑,雙方之後似有言語「切磋」。後來周永恆先發制人出手推開霍哥,霍哥回敬打咗周一巴。二人身邊嘅工作人員同鍾培生都立即隔開雙方,但冇耐又打過,仲打到枱都跌埋。
不過兩個人喺地上扭打之際,周永恆突然伸手拍一拍霍哥膊頭,霍哥就立即收手……打打下架拍對方膊頭呢下舉動極不尋常,唔少人都思疑呢場「熱身賽」係咪事先夾定?而鍾培生就企正中間「分開」霍哥同周永恆,畫面好靚。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!