李丞責作育「嬰」才有樣睇

東方日報
·1 分鐘文章
丞丞師傅教分析BB長相,一切從「頭」說起。
丞丞師傅教分析BB長相,一切從「頭」說起。

繽FUN星網節目《玄途有李》由著名堪輿學家李丞責博士,與主播嘉琪一齊暢談風水玄學。再為人父的丞丞師傅在最新一集中,以玄學角度分析BB長相。他指雖然BB樣子仍未定形,會不斷變化,但仍可從其他方面分析:「頭係主宰整個身體,頭嘅大細係代表個人聰唔聰明,頭大係比較聰明。另外,BB由0至13歲嘅運程係睇耳朵,所以細個唔好貪靚去穿耳窿,否則會破相。耳角高於眼眉,必定係聰明人,耳白喺面係會出名嘅徵兆,冇耳珠以前嘅人覺得係冇衣食,有耳珠嘅人一般都係鍾意食澱粉質,尖耳嘅人就揀飲擇食,BB係咁嘅話就難教難養。」

他又指通常會看BB的「頭髮轉」,髮轉愈多愈頑皮,而且容易走極端: 「髮質愈幼細愈貼服就愈好,代表細心、細微、靈活性高。BB仔啲頭髮最緊要唔好豎起晒,正常溫度都豎起嘅話代表惡,如果又粗又密又豎起,即係個人豪氣、率性、勇猛,睇你訓練佢邊方面發展,都會有可取之處,總之天生我才必有用。」