李丞責教你擺陣催運

東方日報
·1 分鐘文章
李丞責知道大家旅遊癮起,與嘉琪占卜問卦。
李丞責知道大家旅遊癮起,與嘉琪占卜問卦。

繽FUN星網節目《玄途有李》由著名堪輿學家李丞責博士與主播嘉琪一齊暢談風水玄學,第3集以家居風水為主題。丞丞師傅講解今年的財位、文昌位及桃花位,以及如何布陣趨吉避凶:「如果間屋係坐西向東,今年財星入宅,發到不得了!如果唔係就要靠後天,可以喺西位放啲流水擺設,例如養魚、水晶同水種植物都可以。想事業好就要睇文昌位,今年文昌位喺正東位,可以喺呢個位放4支富貴竹,代表步步高陞,有人會放啲塔形或尖形物件,可以令人集中精神。想少啲是非、唔好同人發生爭執,可以喺西南位放佛像,祥和造型令人冷靜,或者放啲有趣嘅卡通人物,千祈唔好放刀劍、利器或者惡形惡相嘅物件。想旺桃花,可以喺東北位插9支鮮色嘅花;想減桃花,就喺呢個位放啲參差不齊或者已經破爛嘅物件。」

另外,丞丞師傅利用10支不同顏色的筆做占卜,預測今年會否有機會去日本旅行。嘉琪從中抽取2支,得出「木火通明卦」,師傅解說:「代表逐步向好,但要天熱後,夏天開始有機會,秋後會更好。因為天氣乾燥,個木會愈燒愈旺。」