李佳芯做媽咪 要時間搵Feel

視后李佳芯第4度挑戰人母角色，在新劇《有種好男人》飾演17歲兒子吳偉豪的媽媽，她指最大困難是幻想已養育對方17年；而現年24歲的吳偉豪要「減齡」做少年，主要靠變裝及變髮，擔心會髮線後移！

李佳芯（Ali）與馬德鐘主演的無綫新劇《有種好男人》將於下周一（26日）首播，Ali飾演單親媽媽，最大困難是幻想養育了兒子17年的感覺：「對我嚟講係好遙遠嘅事，初頭需要啲時間去攞呢種感覺，同埋唔可以好似之前咁，同啲小朋友一齊嘻嘻哈哈。」問到將來可想如劇中做個內外兼備的職場媽媽？她說：「我係停唔到落嚟嘅人，就算將來有家庭、生小朋友，我唔一定係工作，但一定會做自己想做嘅嘢。」

吳偉豪扮Young驚脫髮

與Ali戲裏戲外似姊弟般相處、被讚投入認真的吳偉豪，今次逆齡演17歲學生，笑稱最大挑戰是「外貌太成熟」，要靠服裝及髮型補救，如穿衞衣、戴耳環及一頭攣毛：「今次個攣毛係夾髮片同搽Mousse整出嚟，個髮片夾喺頭殼頂好辛苦，我驚會髮線後移。」

另外，Ali為陳豪與袁偉豪主持的節目《豪遊咖啡》任嘉賓，她表示入行後因唔夠瞓而踏上「歎啡不歸路」：「如果唔係做藝人，以我性格會開咖啡店，雖然未必賺好多，但起碼可以同唔同人傾偈同接觸。」陳豪自爆拍劇時會供應私伙咖啡：「磨豆嘈到幕後大嗌『靜啲好冇呀？』，後來我擺咗部3公升咖啡機喺度，見到人哋飲得咁開心，遠勝自己飲咖啡嘅感覺。」袁偉豪則自爆婚後興趣改變：「我開始鍾意靜態啲嘅嘢，例如去家品部睇砂煲罌罉，當然望住架電單車好靚、抹吓佢都好爽，但都唔及拎住個好好用嘅煎Pan煮一餐好好嘅飯餸。」