李佳芯大馬出活動被指遭冷待 睇片還原真相原來係咁？

TVB花旦買少見少，但係視后級嘅李佳芯Ali有演技又有觀眾緣，近年反而好清閒，對上一套劇已經係舊年出街嘅《有種好男人》，之後多數被派去做綜藝主持，即使唔係雪藏都可以話係「冰鮮」狀態。

喺香港冇工開，大台安排Ali去依然好多人睇TVB嘅馬來西亞出席活動。有網民影到Ali當日活動出場前嘅情況，見到佢等上台前，另外2位出席同一活動嘅大馬年青藝人喺Ali身邊「掂行掂過」。Ali不防有人出現立即「借歪」，有網民見到就話Ali出埠被後輩冷待，覺得心痛。

不過睇返片段，活動喺商場舉行，但3位藝人唔係喺舞台後邊出場，而係附近空間現身再行一小段路先上台。當時司儀請出大馬藝人陳泓升同陳玟蕙先上台，喺等候區準備出場嘅Ali聽到司儀叫2位同場藝人個名，立即醒水讓位，而2位藝人當然唔會呢個時間同Ali打招呼啦。而Ali稍後先上台，算係「壓軸出場」，當時都有唔少人為佢歡呼。

活動當日Ali仲唱歌助慶，有大馬網民話聽到Ali歌聲有進步，擺脫「魔音」咁話！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！