李佳芯Ali否認揀工作指身份被動等公司安排 被問是否離巢先兆：到時先算啦

視后李佳芯（Ali）自去年出街嘅《有種好男人》後就未再有劇出街，只係參與咗幾個綜藝節目拍攝。有傳指Ali揀工作所以推劇，不過佢喺今日出席活動嘅時候就否認，仲話演員身份被動，要等公司安排，不過就多謝公司俾機會有唔同嘅新挑戰，佢仲回應離巢傳聞，直指到時再算。

Ali今日出席活動時就回應揀工作傳聞，被指近期比較少曝光，佢就笑言「因為真係冇人搵我做嘢」。佢續指個人比較隨遇而安，仲話演員身份相對被動，自己比較偏向有工作就全力去做。（《企業強人》唔係話開頭有你份？）Ali就話冇聽過，亦冇收過通知，仲話係上年因為身體狀況，皮膚有問題逼不得已先會推Job。Ali仲透露冇劇拍嘅時候多咗人搵佢做主持，亦多謝公司安排唔同新嘗試做綜藝節目，唔會覺得被投閑置散。（有網民問會唔會係離巢先兆）Ali就一臉驚訝：「我都仲有約喺身，到時先算啦！」

感情生活方面，Ali就話中秋冇人約賞月都睇煙花，仲透露擇偶條件「傾到偈同善良就得」，仲話唔一定要符合身高外型等嘅條件，更加直言遇到啱傾嘅朋友都難，更何況係感情！