東張西望丨陳彥行母女被騙簽3千萬保單 激動爆喊討公道：戶口資金差唔多蒸發晒

45歲陳彥行（行姐）久未喺熒幕露面，日前為薛家燕有份主持嘅新節目《麻雀鬥室三決一》擔任嘉賓錄影節目；不過竟然又喺噚晚（27日）《東張西望》中見到陳彥行身影？但呢次陳彥行就喺鏡頭面前哭訴，指自己與75歲媽媽墮入總值3千萬元保單風波：「喺我有生之年，都會討返呢個公道。」

陳彥行喺節目中透露，陳媽媽喺2018年認識某銀行理財主管佘先生，兩者關係良好、信任十足，佘先生一星期有三至四日都會到陳媽媽屋企食飯；同年7月佘先生建議陳媽媽投資，但基於陳媽媽高齡，需要陳彥行一齊開設聯名戶口。一向與陳媽媽財政獨立嘅陳彥行表示：「落到去簽文件好簡單，佢係咁話『呢度呢度』，又會飛晒啲頁數，然後就叫我簽名。」所以以為佢哋已經傾好晒細節及內容，自己嘅角色只係簽名。

直至今年5月，陳彥行與陳媽媽突然收到佘先生離職通知，先發覺陳媽媽戶口存款幾乎被用盡，供款仲達1300萬。陳彥行表示，佘先生曾親自上門道歉指自己做得唔夠好，又透過錄音道歉；當陳彥行喺節目播出道歉錄音時，仲聽到錄音中有親戚反問佘先生：「每張一百萬，有五張（保單），仲要供三年，咁係咪仲要1500萬？」

陳彥行又指曾自行向保險公司查詢，發現原來買咗6份保單，總共要供3000萬：「點供呀？點解佢冇諗過嘅？依家當中5份保單已經失效咗。原來佢製造啲假象，俾人覺得我係一個千萬富翁！」陳彥行仲表示，當陳媽媽知道自己戶口啲錢差唔多蒸發晒嗰陣差啲暈低；雖然佘先生多次道歉又指會協助完成申索，但陳彥行就話一定要替陳媽媽討回公道。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！