東張西望｜利穎怡採訪後巷街霸 被罵仍窮追不捨獲讚勇敢專業

無綫資訊節目《東張西望》近年採訪唔少社會時事及民生等議題，獲得大眾關注。最新佢哋報道街霸「狗婆」持續堆積大量雜物，並長期霸佔鴨寮街一條後巷，上月仲發生火警，令附近街坊及商戶非常擔心及不滿。《東張西望》先後派出主持梁敏巧同利穎怡（Joan）採訪狗婆，不過狗婆態度惡劣，非常不禮貌咁反駁及大罵，而利穎怡就窮追不捨，最終成功令狗婆接受訪問。

《東張西望》一連兩集報道狗婆長期霸佔鴨寮街一條後巷嘅事件，喺梁敏巧訪問狗婆嘅時候，佢已經聲大夾惡話：「疫情到而家人哋都係咁開啦，你哋有冇做過嘢呀？成日針對嗰度做乜嘢呀？跟你哋《東張西望》有十冤九仇呀？」之後被問到點解要封住條路唔比人行，狗婆就話：「有乜嘢敢唔敢做啫？你問吓你哋先啦，搞是搞非，專（門）誣蔑人！」之後，佢仲惡人先告狀咁報警，同話：「咁多問題你唔理，走嚟理我哋弱勢社群？你《東張西望》訪咩問呀？衛生問題？成條巷都係屎你唔理？你食屎㗎？」。

去到噚晚嗰集，利穎怡到後巷訪問狗婆，利穎怡問出多條問題，不過狗婆都十問九唔應，之後冇戴口罩嘅狗婆，突然對住利穎怡手指指及破口大罵：「火警……你搵返火警嗰個，邊個放火，你搵返放火嗰個，你唔好成日走嚟搞搞震！你行開！行唔行開？唔行開我就報警！」之後，利穎怡繼續窮追不捨，成功令狗婆軟化，接受其訪問。節目出街後，網民都留言大讚利穎怡，例如「利穎怡很專業，值得一讚」、「加油，東張女神」、「 你真勇敢」及「睇緊東張深水埗街霸單野，真係好勇」等等。

現年34歲嘅利穎怡，多倫多大學畢業後回港發展。喺加入無綫後，佢除咗主持《東張西望》之外，亦有參演唔少劇集拍攝，不過就以配角及閒角為主，例如《My盛Lady》、《忠奸人》、《愛·回家之開心速遞》及《陀槍師姐2021》等等。有「東張正義女神」之稱嘅利穎怡一向勇字當頭，過往曾追訪過唔少危險事件，獲網民大讚專業及勇敢。至於感情方面，佢喺2019年被爆出與圈外男友結婚，Joan一直都將感情事低調處理，所以極少喺社交網站放閃。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！