【萬千星輝2020】林峯提名16次視帝今年可以打破宿命?陪跑王仲有黃宗澤/鍾嘉欣...

·2 分鐘文章

一年一度嘅《萬千星輝頒獎典禮》將於星期日(10日)舉行,早前無綫已經公佈咗各個獎項嘅提名名單,最佳男主角同最佳女主角繼續成為大家嘅焦點。雖然大家仲未知今年視帝視后花落誰家,但今年被網民捧為視帝大熱門嘅有《踩過界II》王浩信、《使徒行者3》林峯及《使徒行者3》馬國明,而視后大熱就有《殺手》龔嘉欣、《使徒行者3》黃智雯及《踩過界II》蔡思貝。過往都有唔少小生花旦角逐視帝視后寶座,不過就一直與獎項無緣,而家就同大家睇下邊位係專食白果嘅陪跑王啦!

《使徒行者3》劇照
《使徒行者3》劇照

過往已經獲得16次視帝提名嘅林峯,有唔少經典角色,例如《尋秦記》趙盤/嬴政、《再生緣》皇甫少華、《律政新人王》Ben、《溏心風暴》Alfred、《溏心風暴之家好月圓》管家仔及《談情說愛》Kingsley等等,當中以《使徒行者》嘅爆Seed最大機會榮升視帝,不過可惜大熱倒灶,之後更決定離巢向外闖,當時唔少網民都認為無綫欠林峯一個視帝。重返娘家拍劇嘅林峯,今年再憑爆Seed一角入圍「最佳男主角」,唔知佢今年可唔可以打破宿命呢?

除咗林峯之外,一直與視帝視后無緣嘅仲有黃宗澤(15次)、郭可盈(12次)、鍾嘉欣(11次)、吳卓羲(10次)、蒙嘉慧(10次)、邵美琪(9次)、滕麗名(9次)及徐子珊(8次)等等。

黃宗澤
黃宗澤
鍾嘉欣
鍾嘉欣

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!