欣宜5王1后自肥騷 Anson Lo送自己冧「老婆」

Anson Lo口甜舌滑兼為欣宜抹汗,冧到她暈大浪!
Anson Lo口甜舌滑兼為欣宜抹汗,冧到她暈大浪!

「女神」級的鄭欣宜名花有主,但在紅館個唱上依然不停「自肥」,除邀「老公」Anson Lo卿卿我我發表愛的宣言外,又請來ERROR任壓軸嘉賓大唱《擁抱愛》,一晚被「5條King」輪住圍,難怪濕完再濕!

欣宜一連3場《Between Us鄭欣宜演唱會2022》前晚在紅館開鑼,被她暱稱為「老公」的MIRROR成員Anson Lo以頭炮嘉賓身份登場,全場嗌爆喉嚨,她興奮地說:「成日發夢見到呢個人,我真係好鍾意佢,多才多藝!」全場起立尖叫,「兩公婆」合唱《不可愛教主》,Anson Lo施冧功搭住欣宜膊頭,令她害羞甜笑說:「夢想真係可以成真㗎!」

Anson Lo又用紙巾為她抹汗,說:「我哋工作上接觸大約一年半,感受到你對音樂、對事業嘅認真,今日下午綵排到上舞台,感受到你終於做到你想做嘅嘢。」又以「後輩」自稱,欣宜即由感動變笑:「我唔係大你好多之嘛!點解你冇帶禮物送畀我嘅?」Anson Lo即深情說:「我個人咪就係禮物!」冧得她大叫:「喂呀!我輸喇!」之後Anson Lo獨自跳唱新歌《King Kong》。

ERROR送「濕」Tee

Encore時,男團ERROR現身合唱無綫劇《愛.回家》主題曲《擁抱愛》,並送上印有成員肖像的「春夏秋冬系列」上衣,代表春天的Dee說:「春天令人諗到潮濕,你着我呢件Tee就好潮,然後好濕。」欣宜發嬌嗔作狀打他,他再解釋:「我意思係熱到出汗,濕晒!」肥仔則說:「夏天梗係着我呢件雞翼袖,你老公(Anson Lo)新歌MV都係着雞翼袖,襯晒佢。」而保錡在台上拍片大講招牌「港普」,193則趁機宣傳Solo歌。

收身成功的欣宜整晚如開時裝騷,先以橙色巨型紗裙清唱《女神》為個唱揭開序幕,一秒間又變身螢光Pink Lady,向來感性的她感觸哽咽:「我唔想喊住,畀我講啲好重要嘅嘢先,4年前開咗第一次紅館演唱會,但唔知點解,今次感覺好似係第一次咁……」

ERROR送上獨一無二的T恤,欣宜愛不釋手。
ERROR送上獨一無二的T恤,欣宜愛不釋手。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能