5大人氣海鮮湯沾麵店 特製龍蝦沾麵、番茄蝦湯沾麵

沾麵除咗傳統豚骨同魚介湯底外，仲有好多唔同選擇或配搭㗎～今期搵咗幾間以海鮮風味嘅沾麵畀大家，鍾意食沾麵嘅朋友唔可以錯過。

特製龍蝦沾麵 龍平沾麵製作所

太古新開嘅傳統日式手工沾麵專門店～招牌特製龍蝦沾麵上枱熱辣辣，龍蝦湯底非常creamy，散發出濃濃嘅龍蝦香氣，鮮甜濃郁，湯底夾雜住粒粒龍蝦肉，濃稠度剛好；加上入口彈牙嘅麵條，層次感豐富。餐廳仲推出套餐配特大炸蠔，極上3L廣島蠔真係超大隻，炸漿鬆脆，一咬落去滿滿蠔汁，好出色！

黃金蟹糕牛奶沾麵 富山麵家

銅鑼灣平民日式拉麵店，係唔少附近上班族嘅飯堂呢。黃金蟹糕牛奶沾麵帶少少西日fusion嘅感覺，有啲似忌廉湯，但冇嗰份油膩感，仲幾香滑。麵中間會放上一份蟹膏，撈埋一齊食會食到淡淡蟹膏香，叉燒則肥瘦適中幾滑嫩。

蝦汁帆立貝沾麵 幸屋

灣仔小巷內嘅拉麵店，裝修富有日本風味，主打多款拉麵同沾麵。蝦汁帆立貝沾麵嘅蝦湯好濃郁，伴有大量櫻花蝦、半肥瘦叉燒、溏心蛋同兩粒帆立貝，好鮮味。另有呢款特濃味噌廣島蠔沾麵，湯底係超濃味噌湯，濃厚得嚟唔會過鹹，兩隻廣島蠔夠肥美，蠔味好突出。

神匠番茄蝦湯沾麵 麵屋神匠

餐廳主打蝦湯湯底，番茄蝦湯沾麵就係招牌之一。蝦湯加入大量番茄熬成嘅沾湯，質地濃稠，每一啖都帶有蝦嘅鮮味同番茄嘅酸甜，正好可以令成碗湯更fresh；另外鍾意食辣嘅都可以試吓辛辣蝦湯沾麵㗎。沾麵會配掛汁嘅拉麵同埋羅勒醬法包片，香脆嘅法包片上塗上羅勒醬，呢個配搭好新穎。

牡蠣沾麵 NEXT Shikaku

呢間餐廳以牡蠣為主題，牡蠣沾麵嘅沾汁混合精心調配嘅蠔醬同豚骨濃湯，濃稠而不失蠔嘅鮮味，配埋飽滿嘅日本廣島牡蠣，入口鮮上加鮮。而沾麵選用罕見嘅長方形「平打麵」，由京都知名製麵屋獨家配方研發，再直送香港，麵條質感煙韌，比一般麵條掛湯，每啖都「掛上」蠔嘅鮮味呀～

文：Yanica
編：Cathy