洗米華判囚︳澳門猛人涉足娛圈 撻著Mandy Lieu盛傳俾三億分手費

太陽城集團前主席周焯華,涉及在中國內地開設非法賭場等多達289項指控,前年11月被澳門司警拘捕。澳門初級法院今日對案件進行判決,裁定周焯華創立及領導犯罪集團、不法經營賭博及詐騙等罪成,判監18年。

人稱「洗米華」嘅周焯華,由澳門猛人跨界涉足娛樂圈,本來都只係幕後老闆。但係令佢登上C1頭條嘅,唔止係旗下公司作品幾咁犀利,而係佢同Mandy Lieu嘅一段情。

周焯華喺澳門從事博彩業發蹟,後來創立太陽城集團,除咗開設賭場、金融投資之外,仲跨入娛樂圈。旗下嘅太陽娛樂文化有音樂、電影、藝人管理等業務,全盛時期效力藝人有許志安、薛凱琪、Janice Man、方力申等,出品影片包括《低俗喜劇》、《狂舞派》、《那夜凌晨,我坐上了旺角開往大埔的紅Van》及《翠絲》等,曾經造就古天樂憑《殺破狼.貪狼》成為香港電影金像獎影帝、鄭中基及陳靜憑《低俗喜劇》奪得最佳男女配角等佳績。

「洗米華」成為新晉娛樂大亨,開始頻頻登上娛樂版,不過最哄動莫過於傳出已婚嘅佢喺2014年同混血model Mandy Lieu(劉碧麗)撻著。更爆嘅係Mandy Lieu同洗米華嘅正室Heidi(陳慧玲)幾乎同時傳出懷孕。2015年中,Mandy喺英國誕下女兒,冇耐Heidi亦都為華哥誕下細女。同年年底,洗米華同Mandy公開拖手現身,有傳Heidi決定退出三角關係。

正當外界都認為Mandy「贏梗」之際,洗米華同Heidi關係卻突然好轉,華哥更曾公開表態「周太只有一個」!但係洗米華同Mandy仍未斬纜,甚至繼續「造人」,生咗2個女1個仔。

唔使現身幕前,Mandy 即使為雜誌影相都不施脂粉,同昔日艷光四射大有分別。
唔使現身幕前,Mandy 即使為雜誌影相都不施脂粉,同昔日艷光四射大有分別。

到2019年,有報導話Mandy得到3億「分手費」,帶埋仔女喺英國生活。Mandy喺當地開設莊園,並創立有機健康食品品牌,兼且為雜誌寫專欄,轉型做健康家庭系KOL。前年有報導指,Mandy將當年獲贈嘅西半山豪宅作為新濠國際債務嘅抵押,未知同周焯華有冇關係。

而得到「最後勝利」嘅Heidi近年顯得容光煥發,更練出驕人腹肌,不過佢近期已經將IG轉為私人帳戶。

洗米華正室Heidi
洗米華正室Heidi

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!