深夜重播《鬥氣一族》 53歲關秀媚保養得宜身型Fit到漏

最近無綫深夜重播嘅經典劇集《鬥氣一族》，唔知大家有冇留意到劇中飾演劉丹秘書嘅靚女呢？一班90後可能未必好認識佢，呢位樣靚身材正嘅佢其實係第一代「晶女郎」關秀媚！

現年53歲嘅佢，喺1987年參選香港小姐，雖然三甲不入，不過仍然順利簽約無綫，成為藝人。不過可惜同好多而家嘅港姐唔一樣，佢喺無綫一路都係做配角，後期就改簽電影公司拍電影。雖然演過逾半百電影，不過唔知係咪外型關係，經常都係做性感女配角，只令人覺得佢賣風騷多過賣演技，即係名副其實嘅「花瓶」。

雖然佢喺《黑馬王子》入面憑著美艷嘅外表、可愛得來又傻下傻下嘅性格演活咗張家輝飾演嘅「葡撻」女友，成功建立出廿四孝好女友嘅形象。不過佢之後接拍嘅《賊王》就回歸返性感角色，更喺電影中同華哥大玩鴛鴦嬉水，濕身透視非常性感。之後佢俾女警嚴刑逼供嘅時候就只係身穿內衣，令到觀眾完全放錯焦點，不過就同時亦成為佢嘅經典作品。之後90年代尾至2000年初，佢連續接拍咗幾部王晶作品，如《龍在江湖》、《龍在邊緣》、《電影鴨》、《爛賭傳說》，當中更包括喺三級片《強姦終極篇之最後羔羊》中擔正，所以亦被稱為「晶女郎」。不過可惜觀眾都只係記得佢係性感花瓶，所以亦可謂最被忽視嘅「晶女郎」。

2002年關秀媚捲入醉駕事件，之後佢就淡出娛樂圈，而家亦已經全面隱退。有報道指佢靠投資致富，而家生活安定，經常做義工、運動及旅行。現時同細佢7歲嘅前演員李煒尚拍拖13年，感情非常穩定。而家久唔久都會有人捕捉到關秀媚嘅蹤影，見到佢身材依舊都係Fit到漏、皮膚亦仍然靚靚，果然係天生麗質。而佢亦仍然有同圈內人交往，之前吳彥祖投資嘅酒吧開幕佢亦有同男友李煒尚現身支持，俾人大讚郎才女貌。