港姐準決賽舞台報銷 曾志偉呻蝕600萬

今屆港姐競選因有佳麗持續染疫，被迫取消原定本月4日舉行的準決賽，令投資600萬的舞台報銷！大會臨時變陣，由剛確診康復的曾志偉率領邵初等美女拍攝港姐特輯，讓觀眾認識今屆的參賽佳麗。

新冠疫情嚴峻，無綫《2022香港小姐競選》傳共有6位佳麗中招，大會決定取消本月4日的準決賽，19位佳麗直接進身本月25日的紅館決賽！早前確診的曾志偉上月30日復工，夥拍麥美恩、邵初、梁凱晴及關楓馨4位前港姐，為準決賽取消而拍攝港姐特輯，同時正式交代最新安排，志偉表示：「原本我哋拍咗好多片，準備喺準決賽播，咁橋啲片用得番，剪埋一個鐘左右，畀大家認識今年參賽嘅佳麗。」

邢慧敏心情靚

他續指原本落足心機搞港姐準決賽，可惜未能成事：「我哋本身想做一個好另類嘅準決賽，第一係司儀嘅組合，畀4個完全冇做港姐經驗嘅港姐一齊做司儀，全女班好特別啦！第二就係個舞台，後面個Mon會升高降低，兩邊係好大好高嘅屏幕，我企緊呢個位係一個好大嘅水池，下面會滲水、上面會落雨，仲有個好大型嘅歌舞劇叫《Singing In The Rain》，啲女仔已經排好晒，結果依家都做唔到。」他坦言不惜工本搭建舞台，無奈要報銷，慘蝕7位數：「今年使咗好多錢，超過5、6百萬嘅機械工程，但只能夠報銷，因為全部係為今次準決賽特別整出嚟。」又指現時主要做好決賽，確保所有佳麗驗出「一線」後，便將她們集中在一起，然後點對點公司、酒店兩邊走，希望決賽能順利進行。

另外，大熱之一的候選佳麗邢慧敏早前被指母親經營麻雀檔逾10年，去年遭突擊搜查惹上官非，同時她不幸確診，認真禍不單行。事隔數日，她終於更新社交網，分享上月參選期間的花絮照，見她與其他佳麗打成一片，似未受是非影響心情。