港姐2024丨3號王汛文奪「友誼小姐」 曾被黎芷珊點名大讚 職業係政府官員？

《2024香港小姐競選》即將於9月15日舉行決賽，候選佳麗將於當晚爭奪冠軍寶座。日前（4日）大會公布「最上鏡小姐」評審陣容，以及宣布由佳麗投票選出3號王汛文（Candice）成為今屆「友誼小姐」，王汛文除咗被指撞樣周秀娜及陳法拉，其職業更加獲網民注意？

王汛文眾望所歸奪得今屆「友誼小姐」，當佢得悉自己得獎及於師姐陳法蓉手上接過花束時更忍唔住爆喊，表示對奪獎相當驚喜。2號倪樂琳和9號陳甜甜皆大讚王汛文實至名歸，倪樂琳更指王汛文為人友善；對於「友誼小姐」未能奪冠之魔咒，王汛文直言唔怕，反而成為友誼小姐後自信心有所加強。結果一出，唔少網民表示預料之內，認為王汛文好靚女，並睇好佢係三甲之一：「一直挺看好3號的，猜她三甲内，大家努力投票呀」、「恭喜，有預料到」、「有可能冠軍」、「起碼入三甲，雖然不是最漂亮，但是令人不得不喜歡她」、「一直喜歡她，起碼有個獎，有個定心丸，因為有时候TVB嘅結果好難猜」、「果然是她，我早猜是她了」等等。其實早前，王汛文已於港姐特備節目《2024香港小姐 女．遊記》中獲黎芷珊點名大讚佢做足功課，事前上網check晒所有被訪者資料，建議佢可嘗試做主持或司儀工作。

根據大會嘅資料，王汛文今年23歲，身高166.5cm，職業為行政助理，而佢曾於面試時透露自己係由加拿大回港參選，社交帳戶簡介寫上「政府官員」，估計佢係於政府工作。王汛文嘅社交平台與一般少女無異，多PO出自拍、個人、美食及愛貓嘅照片；另外，佢又喜愛跑步、游水、睇名人演講及泡茶等等，認為透過睇名人演講可以睇多啲唔同人嘅人生，又能從中學習；至於泡茶，佢就表示嫲嫲係一位茶藝老師，於童年時已獲嫲嫲教授茶藝及泡茶嘅知識，可謂動靜皆宜。此外，王汛文畢業於加拿大阿爾伯塔大學（UofA），其參選香港小姐原因都係因為畢業後感到迷茫，於是決定參選挑戰自己及藉此回港探望家人，表示媽媽和嫲嫲都非常支持。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！