雅虎香港新聞 灣仔新開日式居酒屋 創新濃香牛骨髓海膽麵
就算而家飛得返日本，都依然無阻日本菜喺香港嘅巿場。最新又有間當代日式居酒屋喺灣仔開業，大部分食材均由日本新鮮直送，有幾款海膽菜式又創新又吸引呢。
餐廳主廚Jason Luk本身係製作甜品、糕餅起家嘅，今次主理就特意將過往做甜品時較著重嘅口感同層次，靈活運用至大阪料理度。例如煙燻牡丹蝦配帆立貝慕斯，就將北海道帶子混埋忌廉、牛油打成慕絲狀後，再放上以刁草油混合嘅牡丹蝦刺身同青蘋果莎莎。並選用感覺清新嘅櫻花木燻製。一打開蓋後，陣陣煙燻香味傳出，食落口感亦軟滑爽身，層次豐富。
如果有海膽控喺度就啱喇，有2款海膽料理要推介。第1樣係海膽多士配松露醬，師傅選出淡味牛奶包，再將之浸過醬油同木魚高湯，然後加牛油同糖煎香，做法就好似法式多士會包住蛋漿嚟煎一樣，令到包邊脆身，而內裡軟腍。輕輕搽一陣松露醬喺面，再大手咁加上成排北海道海膽，吸睛又濃味。
另一道就係牛骨髓海膽麵，橙黃色嘅麵係用海膽汁整出嚟嘅，炒麵底，並加入少少中式甜醋以減油膩感。旁邊烤製過嘅牛骨髓，打完卡後就可請侍應協助，即席加入海膽麵度，撈勻嚟食，油分重啲香口啲。好似呢類較濃味嘅嘢食，最夾就係襯埋大吟釀一齊食。
甘鯛立鱗燒配尼泊爾風味醬汁就夠晒特別，喺日式居酒屋內，居然有尼泊爾風味嘅醬汁，仲要係自家調製嘅添。一般日本咖喱會加入蘋果製作，而呢個咖喱醬則係以燒番茄、芫荽製成嘅尼泊爾甜咖喱再混埋日本味噌而成，額外鮮甜。甘鯛魚燒一片片豎起嘅鱗片，係經高溫油炸過，特別脆口。
無論去到邊，最尾都唔少得甜品，仲要甜品本嚟就係主廚最耍家嘅功夫，當然要試。北海道牛奶脆片配紅豆，揭開粟米脆片嘅神秘面紗，入面有牛奶雪糕、紅豆，用大葉熬煮過嘅士多啤梨，同埋由咖啡加檸檬製成嘅pastry cream，層次變化多元。
另外，餐廳新開嘅頭兩個月，會有魚子醬優惠。如果揀Tasting menu嘅朋友仔，將可加$600加配30g Prunier 頂級魚子醬，為部分菜式點綴同升級。
地址: 灣仔莊士敦道74-80號The Johnston1樓
文：Kar
相：Michael
