無懼惡疫 鐵定婚期 陳煒：點都註咗冊先

藝人陳煒聯同陳敏之及江嘉敏等昨午出席無綫劇《黯夜守護者》宣傳活動，玩遊戲之餘更向現場觀眾派中秋節禮物。身為男主角的陳展鵬身在內地開工，遂透過視像與大家見面，承諾盡快歸隊，囡囡小豬比亦有入鏡。

陳煒今次於劇內育有一名15歲兒子，她笑言自己在這個年紀仍傻更更，問到當時最反叛做過甚麼，她說：「初中無心向學，走去拍拖，令到媽咪擔心又激心。」將於本月底跟醫生男友陳國強結婚，身為「準新娘」的她直言未算緊張，又表示婚禮不用自己準備，因已交由好友何國鉦幫手：「我哋都係簡單同朋友食餐飯。（已經停工？）我仲有工作，嚟緊會主持一個烹飪節目，我忙住寫菜單。（近日疫情反彈，婚禮點都唔改期？）點都註咗冊先。」

陳敏之：係我最後一套劇

陳敏之與江嘉敏今次飾演母女，合作後更「日久生情」，敏之說：「佢好鍾意食，咁啱我哋喺套劇成日打邊爐，後來又約咗成班人去行山。（監製話你好耐冇拍劇？）都係，呢套係我最後一套劇。（約滿無綫？）唔係，應該講我手頭上已經冇存貨，無論劇集同綜藝。」她指近來忙籌辦自家護膚品牌，之後承認合約將滿，差不多要傾續約。