煮．野食｜鞏姿希「心機女」上身句句有骨寸爆6號

由肥媽和陸浩明（6號）主持嘅《煮．野食》喺前日（14日）播出最後一集，節目搵嚟娛樂台主播鞏姿希（Krystl）擔任嘉賓，鞏姿希係肥媽由細睇到大，所以喺節目中有肥媽撐腰，期間可以話係有風駛盡𢃇，除咗不時同肥媽一齊窒6號同叫佢做粗重嘢之外，佢仲句句有骨咁寸爆6號。

擔任壓軸嘉賓嘅鞏姿希，原來係肥媽由細睇到大，因為肥媽同佢媽咪相識多年。鞏姿希喺節目中表現雀躍，不時同肥媽一齊窒6號，更寸爆6號，好似當6號要求Krystl讚佢靚仔時，佢就不留情面咁話：「我要做一個唔講大話嘅藝人。」除此之外，佢又「心機女」上身寸6號話：「咩都話女人啱，咁先係好男人嚟，我真係好鍾意呢個節目呀。」

其實鞏姿希都唔係第一次發揮「心機女」本色，佢喺上年嘅《明星運動會》上參加射箭項目，而當時曾志偉亦有到現場為參賽藝人打打氣，佢喺射箭後轉身向曾志偉擺出一個心心甫士。而呢個舉動就俾鏡頭捕捉到，節目出街後唔少網民都話佢充滿機心。

現年28歲嘅鞏姿希精通廣東話、普通話、英語、日語及韓語5種語言，於英國倫敦帝國學院修讀日語和活動管理兩個學士課程，以及策略營銷學碩士課程。畢業後回港參選《2018年度香港小姐競選》，落選後加入無綫，擔任無綫娛樂新聞台主播，另外佢19年喺《Do姐有問題》中擔任「問題專員」及喺上年為處境劇《愛·回家之開心速遞》客串飾演補習社新入職嘅補習老師Megan等等，近日佢聯同陳嘉慧、布樂文及伍韻婷一齊主持《陀地外國人》，體驗香港嘅外國人生活和文化。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！