疫後再戰《獎門人》 志偉受膜拜自嘲「種蕉」

藝人曾志偉早前確診新冠肺炎，康復後前晚強勢回歸錄影《獎門人》，見他精神飽滿，落力炒熱全場氣氛。同場的邵初失去做港姐準決賽司儀的機會，但不忘恭喜全部師妹「順利入圍」。

志偉早前不幸染疫，其主持節目《開心無敵獎門人》原定上月24日錄影，最終押後至前晚。錄影廠全場爆滿，「獎老」錢嘉樂及阮兆祥率領全場觀眾「膜拜」志偉登場，氣氛相當熱鬧，志偉更拿自己來開玩笑，向兩位「獎老」說：「知道你哋上個禮拜，將節目名改咗做《開心冇咗獎門人》……我原本種橙，點知依家變咗『種蕉』（中招）！」全場爆笑！

薛家燕「秘密關係」擺上枱

嘉賓薛家燕與一眾後輩包括陳曉華、邵初及鄭衍峰等組隊參賽，大跳「十字步」出場，陳曉華等更特意在前額貼上「大粒癦」配合薛家燕的招牌記認。在「乒乓波」環節，薛家燕表明唔識打波，志偉即讓她「打隱形波」，題目講到「同薛家燕有關係嘅男人」時，她竟自爆：「郭富城囉！」

薛家燕坦言由於錄影決定得太急，早兩日才接獲通知，又笑指遊戲原來相當難玩，故交由一眾後輩「代勞」。對於除口罩錄影，她說：「我哋嚟之前做晒快測，都係小心為上。我日日跳十字步當做運動，增強免疫力。」

邵初恭喜師妹全部入圍

而陳曉華及邵初則異口同聲表示「睇獎門人大」，後者透露腳傷已康復，無礙投入玩遊戲。談到本屆港姐競選因有多位佳麗確診，將準決賽與決賽「二合一」，原本在準決賽擔任司儀的邵初變「無用武之地」，她笑說：「恭喜晒，全部19位都入圍，可以一齊上紅館。（你冇得展示口才喎！）咁我哋都拍咗個節目喺4號播嘛。」身為前港姐冠軍的陳曉華則表示想出席決賽，見證重要時刻：「恨去，但未知有冇機會。」