療愈系奇幻新劇何廣沛接通舊物作怪！陳曉華夜半「隱形」

無綫奇幻劇《異搜店》今晚首播，首度升呢「女一」的陳曉華，與何廣沛、吳業坤譜三角戀，而曉華與廣沛拍攝時同樣碰上怪事！

何廣沛、陳曉華與吳業坤主演的無綫新劇《異搜店》，今晚八時三十分於翡翠台首播，新劇由4個單元組成，故事圍繞何廣沛，透過他能與舊物聯繫的能力，解開別人以至自己的傷痛及遺憾。

廣沛飾演內向「宅男」，有別於過往的陽光大男孩形象，他說：「咁少說話嘅角色冇乜做過，同陳曉華好似一凹一凸咁，我內向，佢就好活潑。」劇中成為舊物「中間人」的他，拍攝期間遇到怪事：「劇裏面有部90年代嘅『死機』手提電腦道具，一直都開唔到，拍咗大半個月之後，突然有一次開到機，但當時拍緊嘢，所以即刻熄番，之後就再開唔到，比較可惜，唔知係咪有咩訊息想講。」

吳業坤「裙腳」累事

陳曉華今次捲入三角戀，與男友吳業坤感情出現風波，朝夕相對下與何廣沛日久生情。首度做「女一」的她說：「每日都好似考試咁，一開始可能攞好低分，但自己當然想進步，所以一路觀察身邊人點樣做。呢套劇係一個不斷學習、嘗試嘅過程，有緊張亦有享受！」拍攝時她同樣有「奇遇」：「有日放消夜，我明明留喺廠睇劇本，點知工作入員話見到個廠冇人，仲連燈都熄晒！」吳業坤則放低戇男搞笑形象演醫生，但因「裙腳仔」性格而情海翻波。