盼再續前緣 蔡思貝吳卓羲襯到絕 隨時飛胡鴻鈞

視后蔡思貝於熱播劇飾演女飛虎，鏡頭前英姿颯颯，不過鏡頭背後，其頸、腰和大髀不能承受負荷受傷，要接受物理治療。她與拍檔吳卓羲於劇中未能開花結果，她笑言覺得與對方很合襯，並指跟緋聞男友胡鴻鈞的關係似「拼圖」：「呢個位唔啱搵第二位！」

蔡思貝與吳卓羲（Ron）於劇集《飛虎3壯志英雄》飾演情侶，但未能開花結果，更陰陽相隔，觀眾看後大感愕然，思貝叫大家不要太傷感，因過往角色都是打不死。自認孱弱的她，拍劇時孭着全副重裝備，相當辛苦：「我頭細頸又長，負荷唔到頭盔，條頸扯傷咗，腰同大髀都拉傷筋，拍完要做物理治療。」

問到對Ron印象如何？她表示：「佢好有風度好紳士，有一對電眼好似貓，其實望落我哋都幾襯，大家都眼大鼻大，五官幾襯，希望有CP感。點知我角色咁快死，仲要一吻定情後唔夠一日就冇咗，幾大打擊。（想同Ron再合作？）我有提議下季講番前傳，佢角色好鍾意小魚（思貝劇中角色），我都想知佢點解咁鍾意小魚，拍前傳先知。」

清楚胡鴻鈞行蹤

疫情下她迷上砌拼圖，領悟了「拼圖人生」，感覺如人生般尋尋覓覓。問思貝是否找到另一半？她即扯開話題，指父母有長期病患，每次見他們都會有壓力，平時會跟父母打麻雀消遣。再問會否叫胡鴻鈞一齊打麻雀？清楚對方行蹤的她說：「哈哈，佢忙住唱歌呀！」又稱避免跨家庭聚會，不敢相見，但會傳短訊問候：「問佢有冇嘢做，同佢講我冇錢呀！（攞家用？）唔係，了解吓行程，睇吓佢有冇工作，傾訴吓。（傳你哋感情上有阻滯，需要磨合？）好似拼圖一樣，呢個位唔啱搵第二位，哈哈！無論係乜嘢關係，人與人之間都需要磨合。」