破毒強人｜女神張曦雯短髮造型被批 陳豪好型但把聲咩事 網民：好似就黎斷氣咁

TVB新劇《破毒強人》由視帝陳豪、視后胡定欣、蕭正楠、張曦雯、蔣志光、何廣沛、張寶兒及朱智賢等人主演，劇情主要圍繞「一代毒王」文華（陳豪飾）嘅復仇故事，文華喺12年前被臥底手下葉浩天（蕭正楠飾）出賣，被捕入獄，期間網台記者林可兒（張寶兒飾）不時到監獄採訪佢，文華因患上末期癌症獲得特赦機會，出獄後便展開一連串嘅復仇計劃。劇集喺星期一（7月31日）首播，等我哋一齊睇下網民有咩反應啦！

TVB版《門徒》？
大毒梟文華（陳豪飾）掌控全港過半以上的毒品生意，但最終被葉浩天出賣而被捕，其生意被拍檔鄭福田頂上，文華因患肺癌而被特赦出獄，福田為佢設鴻門宴，如果文華想重掌毒品生意嘅話就當場斬殺。唔少網民睇咗幾集都話《破毒強人》劇情好似電影門徒，留言話「呢套TVB版門徒?」、「咁似門徒」、「劇情有啲似<門徒>」、「抄門徒？」及「抄劉華？」等等。

陳豪好型但把聲咩事？
陳豪喺劇中飾演大毒梟文華，今次佢除咗以頹廢造型演出之外，聲線都落咗唔少苦功，明顯俾佢原本嘅聲線沙啞。唔少網民都紛紛留言大讚佢好型，例如「陳豪真係好有型」、「陳豪zoom close up嗰下『你係差人呀？』拍得好X有型」、「陳豪個造型好有型」、「陳豪做奸角真係好型」及「阿Mo真係演乜都得！」等等，不過網民就唔太鍾意佢沙啞嘅聲線，留言「做乜鬼陳豪好似就黎斷氣咁」、「陳豪呢把聲真係好難聽 好似成日痾屎唔出咁」、「陳豪點做到咁發聲？」、「陳豪成套劇都要扮聲沙？都幾辛苦」、「陳豪把聲有點難聽」、「做咩陳豪把聲咁」及「陳豪無食喉糖？」等等。

張曦雯短髮look趕客
華姐出身嘅張曦雯（Kelly）向來樣靚身材正，係唔少人心目中嘅女神。今次佢係劇中飾演西九龍毒品調查科行動A組高級督察丁若寧，雖然成功打造強悍嘅感覺，不過網民似乎鍾意佢長頭髮多啲，留言話「個短髮look好趕客下」、「其實張曦雯幾靚，係個短髮髮型古怪，所以望落唔靚，可能係形象設計專登咁做」、「張曦雯越嚟越do姐化」、「張曦雯個樣成個do姐咁」、「我覺得張曦雯做得很麻麻，造型更差！」及「她短髮不好看。」等等。

朱智賢由蔣志光個女變老婆
朱智賢喺《食腦喪B》係蔣志光個女，不過今次喺《破毒強人》就飾演佢老婆，蔣志光喺接受傳媒訪問嘅時候就話確實係難為咗朱智賢，蔣志光仲話連何廣沛都話好難接受佢同家姐喺埋一齊。劇集出街後，朱智賢及蔣志光飾演夫妻引起網民熱議，有網民似乎覺得不能接受：「「咩玩法?~ 朱智言（賢）, 演蔣志光...老婆?~」同時亦有網民表示正常「其實想講 有錢了 可以搵阿女的年紀做老婆」、「合理喎，有錢老黑梗係娶後生老婆」及「冇問題架，現實都有老夫少妻啦」等等。

張寶兒演技有進步
張寶兒（Bowie）喺劇中飾演網台記者林可兒Chloe，佢喺頭幾集因要採訪文華，而同陳豪有唔少對手戲。以往不時被網民批評演技嘅佢，今次嘅演技就比網民大讚有進步，例如「張寶兒竟然做得好過張希（曦）雯」、「其實張寶兒都演得幾好。」及「張寶兒又做得比想像中好」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！