【MIRROR演唱會腰斬】紅館危險事件簿 古巨基林子祥跌落台底 劉德華演唱會歌迷觀眾席上跌死

MIRROR演唱會︳歌單一拳公開 一項敗筆與鏡仔無關
MIRROR演唱會︳歌單一拳公開 一項敗筆與鏡仔無關

MIRROR演唱會嘅舞台安全問題,令唔少鏡粉一邊睇show一邊擔心12位鏡仔安全。主辦單位去到第3場盡量安排佢地喺「平地」演出,之前見到傾斜嘅高架橋、Anson Lo(盧瀚霆)向後仰飛落台嘅表演全部cut走。

到今晚第四場演出期間,場館上方一塊LED屏幕突然塌下,擊中兩名舞蹈員。演唱會要即時腰斬,受傷舞蹈員立即送院治療。據知其中一名傷者係COLLAR成員SoChing男友阿Mo。

為舞台效果而設嘅升降設備用工作人員操控,但係演唱會進行中指令無數,好多時都有出錯,但係足以令藝人同工作人員出事。以往更有歌迷睇show期間命喪紅館!

古巨基跌落台 好彩冇事

2018年基仔嘅紅館演唱會第二場開場冇耐,佢就向後跌落台底,演唱會因此暫停10分鐘,全場觀眾嚇到鼻哥窿都冇肉!好在之後基仔冇事出返來繼續唱。小編有睇呢個show第一場,見到舞台前方有個升降台,用來將基仔出場用嘅時光機收埋,而升降台前面只係得好少位,而基仔又會趁時光機降落台底嗰陣喺台前方同大家講嘢。睇show嗰陣已經覺得牙煙,點知真係出事!

林子祥做嘉賓中伏 8呎高處墮下聽力受損

2003年阿Lam為汪明荃演唱會做嘉賓,台中間一個圓形升降台因為故障未能升回台面,形成一個8呎深大洞。阿Lam唱完歌之後真係唔為意,墮入呢個「深淵」,當時一度昏迷,更要入住ICU。後來雖然冇大礙,但係聽力因此受損,長期耳鳴兼聽唔到立體聲。

林敏驄作品展開show前3個鐘冧台

林敏驄2017年喺紅館開作品展,開騷日黃昏時份,台上一個直徑2米嘅圓形升降台突然大幅傾斜6呎,企起上面嘅9個人墮下,大會立即報警求助,大批消防同救護趕到。傷者主要係舞蹈員,而草蜢嘅蔡一智都因此受傷,當晚草蜢因此只得2位成員上陣。

郭富城舞台斷威也

叫得「舞台王者」,郭富城嘅演唱會梗係多舞台效果。2012年城城嘅紅館show舉行期間,佢身處嘅升降台突然斷「威也」而急墮3米,令城城跌喺地。好在唔係太嚴重,城城好快又勁歌熱舞了。

劉德華歌迷紅館跌死

去過紅館都知,觀眾席樓梯十分斜,好驚差錯腳碌落山。1993年劉德華舉行紅館個唱,大會喺現場上空放氣球,歌迷都會搶嚟留念。有位男歌迷搶波嗰陣失足碌咗落樓梯。其他人立即報警,歌迷頭部受傷昏迷送院,華仔當時十分擔心。後來歌迷搶救無效不治,令華仔相當自責。紅館亦有好一段時間唔俾演唱會以同類手法派紀念品。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能