美麗40路決賽｜仙迪陳雅慧奪冠實至名歸 個台細到被網民嘲似中學禮堂

ViuTV舉辦嘅選美真人騷《美麗40路最美一夜》喺噚晚（29日）舉行總決賽，邀請黃智雯、方皓玟及《全民造星V》冠軍香胤宅（Lyman）等人擔任評判，11位參賽者經過一輪爭艷鬥麗，冠亞季軍分別由19號陳雅慧（仙迪）、16號馬麗如（Taylor）及1號周雅韻（Connie）奪得，37號趙芮嵐（Yolanda）獲得「perFACE美麗蛻變獎」、「最高人氣佳麗」由10號彭方廷（Kiko）獲得，而「最美麗閏蜜獎」就有由14號嘅翁貝怡（Florrie）奪得。。睇完成個騷之後，網民們都有唔少意見，而家就同大家睇下啦！

個台太細
《美麗40路最美一夜》係錄影播出，一開場就有一眾佳麗大跳性感辣身熱舞，之後更加泳衣、穿晚裝行Catwalk及歌手獻唱等環節，雖然唔少網民對參加者讚不絕口，不過就喺網上留言大彈總決賽個台太細，例如「呢個廠真係無一廠咁有feel」、「個台可以再簡陋啲」、「個台咁細」、「個台有啲細」、「好似人哋嗰啲咩咩聯誼會臨時搭嗰啲」、「又細又亞視feel」、「個場仲細過酒樓」、「好掛住viu個一廠」、「個台好似冇位行咁」、「個台真係太細搞唔掂」及「個台仲細過中學禮堂d 台」等等。

仙迪奪冠實至名歸
11位參賽者喺總決賽過程中展現出女性魅力及唔同嘅美態，19號陳雅慧（仙迪）喺總決賽中表現自信及魅力一面，加上表現淡定得體兼口才了得，最終力壓群芳，脫穎而出獲得冠軍寶座。賽果出爐後，唔少網民都認為佢實至名歸，留言話「仙迪勁sharp」、「Wooo仙迪實至名歸 見到一路既進步 仲有真係keep得好好 呢個努力唔簡單」、「我鍾意仙迪有自信同埋好投入比賽，身材冇得頂！睇完今晚我都覺得佢係冠軍！比賽就係要盡力表現自己，佢有做戲背景，玩遊戲投入角色都係自然反應～反而因為呢一集對佢有好感，多咗留意佢！仙廸期待喺電視再見到你」、「恭喜仙迪」、「冇得輸 ，實至名歸。Congratulations 」、「So happy 仙廸贏咗， 其實佢比賽中途已經越嚟越耀眼」及「仙廸真係好fit,選「美」真係實至名歸」等等。

戥校長及Belle唔抵
曾經係歌手嘅曾凱霖（Belle）喺泳衣環節，除咗大騷美好身段之外，同時亦用優美動聽嘅歌聲，成功吸引網民關注，令人眼前一亮。而文芷苓（校長）貴為賽前大熱，除咗喺總決賽初段獲得Lyman歡心之外，一眾網民亦認為校長整晚表現好好。雖然有唔少網民認為仙迪係實至名歸，不過亦有好多網民戥校長及Belle唔抵，認為佢哋值得更高嘅名次，留言話「Belle睇睇下又好似幾靚」、「希望係其他節目會見到belle」、「Belle 越望越正」、「支持viu簽belle拍belle濟約會實錄」、「同SS一齊拍個節目就正」、「Belle換走bonnie仲好」、「可惜唔係Belle」、「校長先係我心目中嘅冠軍!」、「好好睇，但估吾到校長三甲不入」、「我比較喜歡校長多啲喎」、「校長已經係大家心目的冠軍 I like 校長 ， 還我校長」、「點解唔係校長，支持校長」、「爆冷啊 還我校長」、「校長又型又靚，臨尾30秒拉票，好文采又壓場。」、「點解唔係校長？」、「得校長夠格拎」、「唔明點解無校長份」及「仙三甲我覺得正路，但冠軍應該係校長」等等。

好睇過大台選美節目
喺總決賽中，雖然都有傳統嘅泳衣問答環節，不過一班參賽者都講流利廣東話及表現淡定之餘，對答亦相當得體。同時，比賽中不乏催淚感人時刻，例如5強參賽者嘅親友一同上台為其打氣，送上心思禮物，場面既感人又真摯。一班網民睇完比賽都留言表示好睇過大台選美節目，例如「講真呢d問題聽落有內涵過隔離台果d」、「佢哋答問題make sense過隔離台」、「真香港人選美」、「內涵同年齡成正比」、「啲對答講嘢正常過港姐好多」、「起碼唔洗字幕都聽得到講緊咩」、「40歲真係有智慧d 個個都答得唔錯」、「真心覺得最後五強靚過曬今年香港小姐。要有足夠嘅練歷先散發出4 0路嘅成熟魅力。唔係一般18 22嘅少女可以擁有。」、「每位唔止靚 仲充滿智慧 大方得體 好睇過大台腥港小姐 多多聲」、「佳麗係流利廣東話嘅香港選舉，又感動又好睇」、「好睇過大台既經典選美」及「40路三甲靚過好多屆港姐」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！