老前輩鬧爆 有線女主播離職前錄影廠跳開花舞 跳槽另一電視台被叫停

呢期電視新聞主播界零舍多新聞，因「中東與綜」而為人認識嘅TVB主播麥詩敏接受男友求婚「封盤」；而前Now TV主播丘靜雯早前出席活動被男fans要求合照時，爭啲被掂胸抽水。至於即將終結收費電視業務嘅有線電視，上星期二有兩名女主播梁思齊同余茵娜同日離職，可能因為last day心情興奮，佢地同埋3位女主播同事一齊喺新聞部錄影廠，大跳韓國女團BLACKPINK成員Jisoo嘅「開花舞」，仲拍片擺上社交平台。

本來條片諗住同fans開心share，點知TVB前新聞部主管黃應士睇到之後留言，大鬧女主播們喺新聞部錄影廠跳舞「有辱新聞行業」(A true disgrace to the craft of journalism）。有線新聞及資訊總監關慧玲亦都向同事發通告，提醒各人唔好將新聞部錄影廠視為「嬉笑玩樂的舞台」。

事後有消息話，同時走人嘅梁思齊同余茵娜本來係跳槽去另一間電視台，但因為呢次「開花舞」事件揚咗，加上開聲嘅係老行尊，佢地未返新工合約就已經被hold住！

被傳「跳槽」唔成之後，梁思齊同余茵娜嘅IG都仲有更新，並且不約而同咁po旅行照。余茵娜嘅post寫住「所有的遇見都是緣分的安排」，而梁思齊就話「行到水窮處 坐看雲起時」，似有所指。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！