胎毛筆下的母女情 製筆師承襲母親技藝 傳遞父母關愛
【Yahoo 新聞報道】胎毛筆以往是身份象徵、又或光宗耀祖的期盼,在製筆師 Irene 眼中則代表著父母的關愛,「數唔清嘅頭髮,就係數唔清嘅愛」。胎毛是新生兒未經修剪的頭髮,養分來自母親,此後再生長的頭髮就靠孩子自己吸收營養。正如 Irene 繼承母親製筆技術,去年母親病逝,就要靠自己撐起一片天。
攝影記者:Davies
一支胎毛筆由數百元至數千元不等,視乎材質而定,最多人選雞翅木,木紋清晰,每支紋理獨一無二。Irene的母親徐媽媽生前熱愛詩詞歌賦,想到以新生兒的名字,創作成對聯,刻在一對胎毛筆上。客人要求的對聯,亦不外乎健康或平安等含意,「冇話要小朋友孝順,要名成利就」,Irene指媽媽待她亦如是,「佢畀好大寬容度我哋,唔需要讀書好叻,但唔好操行零分咁就得,健健康康就得」。
兒時胎毛筆珍而重視 「我見親都喊」
Irene也有徐媽媽為她親自操刀的胎毛筆。徐媽媽過世後,她珍而重之收藏,不輕易取出,「我見親都喊,其實我而家都有少少後悔,點解唔用媽媽嘅頭髮一齊做支筆」。她是長女,還有兩個妹妹,「媽咪從來冇話家姐要讓細妹,妹妹有嘅,家姐都會有,對我哋三姊妹一視同仁,佢真係冇嘢唔好㗎,我媽係我最好嘅朋友」。
徐媽媽對子女的愛護,亦引伸至胎毛筆上。古時胎毛筆是皇室貴族專屬,其後流傳至民間,又稱作狀元筆,成為一種祝福及期盼。「去到媽媽嗰代,唔想變成迷信或風水物件,唔想變成一件讀書好叻、名成利就嘅商品,可能咁樣會有多啲客,但我哋唔想」。Irene傳承母親的想法,認為胎毛筆是傳遞父母對子女的關愛,「因為胎毛筆唔係必需品,其實係奢侈品,係幸福寶寶先有嘅禮物」。
傳統上製筆技藝傳女不傳男
Irene的製筆工藝繼承自母親,徐媽媽則從丈夫家族習得技術。傳統上,胎毛筆製筆師傳女不傳男,他們卻傳子也傳媳,工藝得以流傳。作為第六代傳人的Irene說,若有心人想習藝,亦願意傳授他人,「因為冇人學,呢樣嘢就會冇咗」。
她憶述,2008年母親中風,自己返店舖幫忙,初期遇到不少客人留難,「吓?你剪呀?我係搵大師傅,唔係你喎」。Irene一邊學習祖傳手藝,一邊自我增值,「我真係走去報名去學剪頭髮,剪胎毛做筆之餘,我就諗不如順便幫BB剪吓一啲髮型啦」。
近年徐媽媽身體轉差,已甚少返店舖坐鎮,由Irene兩姊妹主理。今年本是店舖開業25周年,徐媽媽卻等不及便離世。「我好羨慕啲人,可以將祖業發揚光大」,打開instagram,Irene發現胎毛筆在日本非常盛行,遠超香港,「其實我有啲唔開心,係香港家長唔用呢個平台,定係我哋做得未夠吸引力呢」。Irene的太祖母是清朝宮廷製筆師,由清朝傳承至今,但她堅持不以此作賣點,「如果我下下都以我上一代做得幾輝煌嚟游說你,但我呢一代做唔出咩成績,咁又點呢?」
媽媽創「啟蒙開竅禮」
投身家業14年,Irene已為上萬個小朋友製作胎毛筆,當中包括涂太。長子4年前由Irene製作胎毛筆,今年到3個月大的幼子,同時亦為長子舉行「啟蒙開竅禮」。傳統胎毛筆的「售後服務」包括在小朋友6歲時用胎毛筆舉行「開筆禮」,徐媽媽則深信三歲定八十,增設啟蒙開竅禮,小朋友約3歲就可返店內舉行,由製筆師輕掃眼眉、咀、耳、鼻,再說一些祝福語句。
涂太認為,胎毛筆富有意義,來自小朋友身上脫落的第一把頭髮,「頭髮一出世就有,就咁剪咗佢嘥咗啲喎」,便決定製成既實用﹑又有紀念價值的胎毛筆。她笑言,若兒子長大後,對胎毛筆不感興趣,「咁畀我留念囉」。
【胎毛筆製作步驟】
愛思胎毛筆 Instagram