菊梓喬廣州演唱會被觀眾力數5宗罪 狠批寒酸及觀感差：以後送都唔睇

前「星夢一姐」菊梓喬（Hana）日前（8月30日）於廣州中山紀念堂舉辦《Now and Forever》從心出發巡迴音樂會——廣州站，不過入場歌迷對演唱會極不滿，於社交平台力數5宗罪；有網民將Hana個唱與早兩個月同地點舉行嘅JW王灝兒和吳若希個唱作比較，直指Hana呢次演唱會較遜色，更狠批觀感差：「看了十幾年最差的一場演唱會，沒有之一。」

有網民分別於社交平台大呻Hana廣州音樂會觀感差，直言想製作單位回水。首先，網民批評歌單中太多翻唱歌曲，整場個唱共獻唱21首歌曲，但當中有9首都係翻唱其他歌手嘅作品，包括謝霆鋒《玉蝴蝶》、連詩雅《到此為止》等等，反而過往好多為人熟悉嘅劇集歌曲都無唱到，例如《欲言又止》、《飛蛾撲火》、《我不是她》、《萬年》等等，更有網民整理出Hana過往嘅劇集歌曲清單，直言無唱到太可惜：「我個人係覺得比較可惜，好多都無唱到」、「人來看你是為了聽你的原唱，而不是翻唱」、「翻唱佔了1/3，不是不可以翻唱，但沒必要翻唱那麼多吧」、「OST加翻唱歌，這樣的水平還開演唱會，是覺得大灣區的錢好賺嗎」、「我都係聽佢全部都係主題曲，本來好期待」、「都有快一半是別人的，就別開演唱會了吧」、「真是好多翻唱，熱門歌曲也沒唱」、「以後送都唔睇」「下次有人請都唔想去聽的感覺」等等，更指聽到附近嘅人喺到玩手機。

除咗翻唱歌太多，網民又感覺Hana大部分時間都僅與前排觀眾互動，無咩點理其他位置嘅觀眾。另外，有網民認為當晚現場音響有問題，Hana表現亦未如理想，除咗走音、忘詞，更對Hana唱唱吓歌成日喺到傾計表示不解，認為氣氛尷尬：「首先唱歌是走音，沒有停頓找不到key」、「點解好幾首歌唱唱下又係（喺）度傾計？唔記得歌詞？傾得有d（啲）耐，其實唔係唔比（畀）你唱唱下講野，但係頻率有d（啲）高，高到我聽眾都有印象，而且傾計幅度有d（啲）大」、「有幾首歌唱下就喺度講嘢，唔係好認真囉」、「我都唔知佢同乜水系度（喺到）傾」、「唱著又遞麥（咪）又聊天，導致歌曲唔連貫」、「感覺她一點都不真誠，也沒好好珍惜舞台啊」等等。不過，就有網民留意到Hana經常搞個耳機，認為可能耳機有問題。

此外，有唔少網民認為Hana個唱極慳水慳力，除咗得兩名舞蹈員，更大問題係Hana嘅服裝。當晚，Hana大部分時間以銀色露腰上衣搭配同色短裙及穿窿黑色絲襪表演，全晚只係換得一件印有「HANA's Garden」嘅上衣，令網民覺得好寒酸：「衣服換上衣，也是無言」、「老實我看20幾場show無見過得一套衫嘅歌手，encore換件T恤，下面條裙都係一樣嘅裙」、「牛仔褲都不換條」、「一套衫唱2個鐘，最後encore換左件T恤，會不會有d（啲）寒酸？好靚身材，無多兩套衫看」、「服裝都沒錢買嗎？可以問人家借啊，平時的私服不能穿嗎」、「一看就是一個很窮的演唱會，這服裝認真的嗎？」、「就是有點窮酸感？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！