蘭桂坊新開星馬菜 推介坊間少見獅城咖啡骨+正宗巴生肉骨茶

蘭桂坊酒吧就開得多，不過原來最近有間星馬菜餐廳悄悄進駐，藏身於一間精品酒店嘅一樓，要上去首先要入一間酒吧再搭電梯上去。餐廳主打傳統星馬菜式，選用新鮮食材配合自家製醬料，大部份嘅食材及醬料都由星馬入口，咁樣菜式先會有當地風味，旅行依然遙不可及，想念星馬菜嘅朋友可以過嚟試試！

巴生肉骨茶($238/4人份)

招牌巴生肉骨茶，大廚話呢道菜係好多客人食完後都話味道好正宗，同當地味道好相似。肉骨茶採用當地醬料製作，加入十幾款藥材，有濃郁藥材味之餘又唔會太搶。而入面材料都好豐富，有排骨、豬腸、豆卜及油炸鬼等。

獅城咖啡骨($158)

喺香港比較少見嘅菜式，呢道菜式用咖啡入饌，特別揀返馬來西亞當地嘅咖啡，有香濃咖啡味又帶甜，又唔會搶咗骨嘅肉味。好有當地風味呀～

娘惹沙律($98)

同樣都係香港比較少見嘅菜式！幾款新鮮蔬菜上淋上自家製娘惹醬汁，醬汁加入椰糖等調味料，味道偏甜帶微酸。

怡保芽菜雞($158)

芽菜雞係怡保嗰邊嘅名菜，怡保嘅芽菜得當地先有，特別短身厚肉又肥嘟嘟，口感爽脆。雞就選用三黃雞，雞味重，烹調方式就係用雞水浸約40-45分鐘，啱啱好熟，肉質嫩滑。

白胡椒炒蟹($398)

跟足馬來西亞造法，先將料頭爆香，最重要係加入當地黑醬油，呢款醬油帶甜有鮮味。另外再加埋原粒白胡椒，先炒香再打碎，胡椒味都特別香濃，蟹肉亦新鮮彈牙。

原隻大頭蝦喇沙($188)

喇沙味道微辣，偏向椰香味較重。原隻大頭蝦好大隻，有蝦膏兼彈牙鮮甜！

手工娘惹糕點($42)

特意搵娘惹媽媽（馬來西亞華橋）手工做嘅娘惹糕，一層一層做出來嘅娘惹糕，必需於每一層嘅糕漿凝固咗先可以做另一層，極花時間同技巧，外型搶眼之餘口感軟糯，甜度適中，味道有啲似拖肥糖，清新香料味突出，係一道誠意甜品！

獅城星馬餐廳
地址: 中環蘭桂坊德己立街23號晉逸蘭桂坊精品酒店1樓