人氣Vission Bakery副線！實測中環全新邪惡美式蛋糕店

每次經過中環嘅大街小巷，總會發現一啲可愛又有新鮮感嘅小店。最近乘坐中環往半山嘅扶手電梯路上，發現一間全新蛋糕店，以透明長形蛋糕櫃吸引唔少途人留步打卡，究竟係咩來頭呢？

夢幻蛋糕櫃展示逾20款甜品

呢間蛋糕店正正係大坑美式曲奇店Cookie Vission同長期人氣高企嘅烘焙品牌Vission Bakery嘅副線，主打造型華麗嘅美式蛋糕。雖然係外賣店，但係佢哋採用透明櫥窗展示出品，設計相當吸睛，每每經過都忍唔住行前幾步睇吓有咩啱心水。開飯仔喺新店試業首星期到店爬費實試，究竟值唔值得食呢？

店舖嘅蛋糕款式超過20款，當中主要供應美式海綿蛋糕同甜批，款式包括招牌開心果樹幹蛋糕、紅蘿蔔蛋糕、咖啡香蕉蛋糕、朱古力花生牛油蛋糕、朱古力布朗尼蛋糕、黑芝麻忌廉蛋糕等等。海綿蛋糕均約有7層，橫切面睇得出層次同餡料都好豐富！

開心果控天堂！1米長招牌蛋糕+軟心芝士蛋糕

開心果熱潮有增無減，而店舖嘅招牌都有開心果坐鎮。超過1米長嘅開心果樹幹蛋糕實物都幾震撼眼球，以開心果海綿蛋糕夾上開心果生朱古力、忌廉、開心果仁碎同埋黑醋栗蜜餞，10重口感集於一身，絕對係味覺嘅享受。

開心果芝士蛋糕以分量澎湃嘅香烤開心果仁鋪滿整個蛋糕面，濃稠開心果醬同脆卜卜餅底配半熟軟心芝士蛋糕，開心果味濃郁得嚟仲好重芝士味𠻹！不過開飯仔同網民評價嘅食後感都係：略為飽膩。小店亦因此調整配方，最近改良成「輕量版」，更貼近港人口味；另外仲有開心果巴斯克蛋糕，大家亦可以試吓～

7重層次海綿忌廉蛋糕

眼見唔少客人經過都會入手一、兩件蛋糕，當中黑芝麻忌廉蛋糕好搶手，所以決定入手試試。呢度嘅海綿蛋糕質感唔似戚風蛋糕咁鬆軟，冇咁重空氣感，反而偏濕潤實淨；黑芝麻忌廉香氣十足，口感似忌廉芝士般硬身，但最驚喜係中間加咗檸檬脆脆夾心，清新解膩，估唔到同黑芝麻又幾夾喎。

另一款賣相精緻又吸引嘅口味就係海鹽焦糖香蕉蛋糕，表面灑上海鹽焦糖好誘人啊！內餡加入流心濃郁嘅焦糖醬同軟綿香蕉片，兩種香氣相互平衡得幾好，食落唔會太甜，焦糖仲做到齒頰留香𠻹。

Vission Nine
地址：中環蘇豪士丹頓街9-11號Shama Soho LG樓

文：Sharon
編：Cathy
相、片：Tom
剪：Tony