袁和平老馬有火

【星島日報報道】電影世界里，絕少劇本屬純原創的，多數是東抄抄、西抄抄，正是「橋」唔怕舊，最緊要受！ 其中有條「橋」，雖古今中外電影頻頻炒，但頻頻大收特收，無論上世紀六十年代的黃飛鴻、七十年代的李小龍 到今個年代的葉問，全部一條公式：一、某某武林高手因個人原因退出江湖，決心歸隱；二、改名換姓到小店打工，希望盡忘前事；三、遇上不公義事件，當睇唔見，死忍；四、壞分子得寸進尺，逼害良民之餘，更將大俠當蟻民，照打照欺負；五、大俠忍無可忍，為大局終於出手，露出英雄本色，將一眾中外衰人打個落花流水，大快人心，匡扶正義；六、洗「太平地」後，居民過回安樂生活，奉大俠為偶像。 前日走入戲院睇《葉問外傳：張天志》，一開場，我已會心微笑，因編劇費慳番得 ，搵個中學生能力者，已可將大「橋」寫出，賺其Easy Money。 主角張天志（張晉飾）的經歷，正正就是上述六大「倒模橋段」。即是一開場，觀眾已可預見結局。咁，好唔好睇呢？視乎你追求乜喇。呢類唔使用腦戲，通常會充滿官能刺激，《葉問外傳》絕不例外，由頭打到尾，高手如麻，包括張晉（全國武術比賽冠軍）、巴帝斯塔（世界冠軍摔角手）、Tony Jaa（泰國拳霸）及釋延能（少林武僧，總教頭德揚禪師得意門生），勁唔勁？ 如此陣容，當然打到開花。更何況，此片導演乃國際頂級電影武術指導「八爺」袁和平呢。七十三歲的袁和平肯再執導演筒，當然唔衰得，所以《葉問外傳》武打場面，全皆精心設計，拳拳到肉，極具中國武術美感。唯一可彈，為太多飛簷走壁，故此，吊威 痕 處處，略感過量。演員方面，較值品題為飾演吸毒者的周秀娜，睇住佢由 模一類「冇腦」博曝光 妹開始，愈演愈成熟，早早擺脫「得個殼」形象，變成實力派演員，其努力令人激賞。 曾智華 專欄