被指「戲屎」萌退意 阿佘唔記得着褲 拒再接真人騷

視后佘詩曼公認好戲，不過她接受電台訪問時坦言曾因被指戲屎，打算退出娛樂圈。她更大爆於內地拍真人騷時，一時忘記有攝錄機，於家中「沒着褲」在鏡頭前走過，笑言以後都不會接拍。

佘詩曼近年於內地發展，劇集、綜藝節目、真人騷統統拍過，絕對「襟撈」，日前她接受鄭裕玲電台節目訪問時，大爆曾於內地拍監察式真人騷節目，當時屋內布滿錄影機：「要當冇人咁，唔知點樣要喺有30幾部機嘅空間都表現得好自然，拍咗個幾月，好辛苦，試過第一日換衫唔記得咗，着住短褲仔，我即刻同佢哋講『頭先我冇着褲呀！』之後就提高警覺，我諗我唔會再拍。」

她又指拍攝第一套劇《雪山飛狐》時，劣評如潮，被外間指演技差兼雞仔聲：「嗰陣我要拍一場喊戲，陳錦鴻係喊晒，但我就喺度笑，導演叫我睇playback，我一睇覺得自己做得好差，好想喊，覺得好醜。」她坦言：「有諗過唔做，要退出娛樂圈，但TVB安排一部又一部，令我唔記得咗！」

表明唔想做司儀

直至2000年拍劇集《十月初五的月光》令她重拾信心，知道當時公司打算北上拍攝《酒是故鄉醇》，她即找高層曾勵珍自薦：「我話想試吓實景拍攝，佢真係畀咗個機會我，拍完我真係開咗竅。」現時拍戲兼出歌的她，被問到有否想做其他工作範疇時，她說：「未卸任（港姐）時，要同李明慧、鄧梓峰做《歡樂滿東華》司儀，我因為呢件事瘦咗5、6磅，真係好驚，驚到做完即刻打畀高層，叫佢喺電腦記住，我以後唔想做主持。」