裕美親力親為開珠寶網店 堅持冇用林作一分一毫

藝人裕美自從和林作拍拖後，為積極洗「失婚婦」的污名，加上欲向對她不滿的未來奶奶，即林作媽咪表達出「唔hea嘅一面」，她在社交網宣布開網上珠寶店做老闆娘，更揚言到年底要賺200萬，而男友林作全力用把口支持，若果女友賺不到200萬要「消失」：「目標擺第一，冇200萬，人生冇意義！」

裕美接受訪問稱：「做珠寶店唔係因為林作媽咪，我唔會因為任何人，或要威畀佢睇，純粹我鍾意珠寶，加上我媽咪以前都係做珠寶嘅，一直以嚟，我都係自給自足，供養媽咪，情感上唔係咁獨立，但做嘢、賺錢就好獨立，如果做一個生意會賺到好多錢，但我唔鍾意，我都唔會做，或唔會做得長，但珠寶我好鍾意，咁先有心去研究。我媽咪以前都係賣畀外國客，如日本人，但我近年係瘋狂哋鍾意，自己都買唔少，咁倒不如自己開一間啦，我都籌備咗幾個月，做吓市場調查，睇吓人哋啲產品嘅質素，好基本嘅嘢我都知道嘅。」

問男友可有經濟上支持？她說：「我投資咗6位數，全部自己錢，仲係不斷投資買貨，我仲有一批貨未上網，貨源絕對唔係平，由小量做起，今日算係開始試業叫開幕，其實網頁嗰啲嘢我仲未搞完，但我都租咗一個地方畀自己工作用。至於林作，我係冇用佢一分一毫，只要貢獻佢個樣出嚟，因為佢二手名牌店做得好好，不過有關法律問題、保險，佢係一個顧問咁囉，都有問佢有關開網店嘅經驗，但間店主力都係我。」問到林作表示如她到年底賺不到200萬就消失，她說：「如果我賺唔到200萬，林作消失係ok嘅。（可會搵男友做模特兒？）已經有客問我點解唔用自己張相做網店個圖，話林作個樣咁eleven（醜），我覺得咁做就啱，佢個樣咁eleven，會令人印象深刻，我哋好前衞，我哋搵一個男人仲係唔係靠樣，唔係靚仔咁就係目標啦。（大壓力？）唔會，做生意係要有目標嘅。」

她又說連珠寶的相都是她親自影、網站都是自己搞，還會親自覆客，如他日好忙才請人，覺得開網店不算辛苦，現時都是「喪喺網上買嘢」，覺得這個大勢所趨，不過可能買珠寶睇實物會更清晰，所以如有客訂造珠寶，她會將鑽石放大一百倍，給客人睇清楚鑽石可有雜質或裂痕，還會有幾粒供客揀：「我係同香港廠製造商合作，我揀嘅石無論大定細，大有證書，細嘅如切割靚都好閃，就算細石都會揀最靚去拼，坊間有白有黃，個效果唔係咁好，價錢又高，我買開就知值唔值呢個價。」她又指現時已有生意，客路平同貴都有，其珠寶還會提供改款服務。

林作被問到為何不投資，他說：「網店唔係租地方，唔使咁多成本，（女友係咪想向媽咪表達是有志向的人？）佢有佢嘅方法，媽媽遲早會明白她佢。」但問可會帶媽咪幫襯作支持，他沒有回答。