譚俊彥送單車促進爺孫情 陳山聰笑囝囝複製百厭基因

藝人陳山聰宣傳新劇時公開「出土童年照」，獲讚可愛的他自爆以往曳事之餘，更指囝囝似他一樣百厭，無論靚樣及性格都十足餅印。

譚俊彥、陳山聰、龔嘉欣及譚凱琪等昨日出席無綫劇集《十八年後的終極告白2.0》宣傳活動，席間一眾藝人大晒童年照，炒熱全場氣氛，當中以山聰的「肥仔Look」尤其趣致，他說：「張相應該3歲時喺澳門影，呢排成日攞番啲舊相出嚟，同囝囝做對比。（似你？）似我一樣咁百厭！佢尋日復課就整親個頭，出門前玩玩具車，撼咗落電視櫃。（撞完咪變狀元囉！）希望啦！」他續自爆兒時的頑皮事：「試過跟阿媽去買餸，點知差錯腳跌咗落坑渠，隻腳爆晒缸，又試過成個頭撼咗落魚缸，縫咗10針！」

龔嘉欣準備好做「鬼」

而龔嘉欣透露正準備新劇《靈戲逼人》今天的首拍，她說：「會去好多廢校同村屋取景，鬼片夜班特別多。（扮女鬼使唔使吊威吔？）多呀，成日飄嚟飄去，同張振朗仲有浪漫愛情戲。（容易感應靈體？）冇事嘅，今次係喜劇會好啲。」

另外，譚俊彥透露早前內地公幹返港後，僅見過爸爸狄龍一次：「佢依家好深閨！我個女7歲生日，買咗架單車畀佢，諗住叫爺爺教佢，兩爺孫增進吓感情。」他又笑指囡囡愈來愈有性格：「叫佢行過嚟佢會話No，已經好自我。」談到《十》劇首周只錄得14.7點收視，成績未見突出，他說：「依家好多觀眾都喺其他平台睇電視，不過（收視）應該有上調空間嘅。（對套劇有信心？）有，嚟緊劇情開始入肉，我個角色開始露出真實一面。」