跟高人練刀法 龔嘉欣斬豬肉 街市搵着數

·2 分鐘文章
龔嘉欣獲專家指導,斬豬肉有板有眼。
龔嘉欣獲專家指導,斬豬肉有板有眼。

陳豪與龔嘉欣日前為新劇拍外景,嘉欣稱在街市開工福利好,既可趁機買餸,又獲檔主優待預留平靚食材;至於家庭煮夫陳豪稱百物騰貴,笑言在街市買餸時會向檔主𢱑着數,認真知慳識儉。

藝人陳豪、龔嘉欣、林景程及易宇航近日為無綫新劇《四十二章經》在中上環一個豬肉檔開工,飾演豬肉妹的嘉欣手起刀落似模似樣,她坦言得高人指導:「老闆娘有教我點斬,我又跟師傅上過堂,但斬嘅時候都驚,怕斬到手,而且把刀好重。」講到在街市開工,嘉欣表現雀躍,她笑言剛剛趁空檔已在附近買了煲湯材料,肉檔老闆娘又為她留了黑毛豬肉,笑言在街市開工好多福利。她平時也喜歡逛街市,跟不少檔主十分熟落:「佢哋成日都會畀着數我,我覺得街市好有人情味,我鍾意自己落手揀。」

陳豪背詩有難度

至於陳豪的角色前世跟康熙有關,在劇中毋須拳打腳踢,只要吟詩作對,他說:「我都有問監製,我個角色有冇特異功能,佢話冇,我負責批奏摺就得,但對白都有啲難度,要背詩,雖然我冇打戲,但都要吊威吔。」陳豪透露平日會在街市買餸,並不時向檔主請教煲湯技巧:「我好鍾意煮嘢食,會諗啲創新嘅菜式,我對口味都有要求,而且價錢又要抵。不過依家忙拍劇,就將呢個責任交畀太太。(你去買餸有着數?)一時時啦!依家街市買餸都好貴,我會叫佢哋送條葱同畀得大舊啲。」

龔嘉欣與陳豪都係街市常客,大把嘢傾。
龔嘉欣與陳豪都係街市常客,大把嘢傾。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能