返Shift壞處多 記憶力差學習能力減低

身邊總有啲朋友，每逢大時大節總係唔見人，好多時嘅原因係「份工返Shift」，喺香港最常見返Shift通常係紀律部隊、醫護人員、司機、傳媒等。返Shift慘在生活時鐘同其他人唔同，有時真係好似同其他人有時差咁。不過原來唔單止係心理上，身理上返Shift一樣會有唔少問題，瑞典烏普薩拉大學（Uppsala University）就公布一項研究，向7千多名返Shift嘅員工（定義係一時返早一時返夜，或者一個月早、一個月夜）進行腦部掃描及臨床研究，顯示出返Shift嘅人比起正常返工時間嘅人，會出現記憶力減退、學習能力降低、集中力不佳、反應遲緩等問題！有得揀，你仲會揀返Shift咩？

無朋友

朋友聚會一定係㨂放工之後時段或者星期六、日，返Shift嘅話，真係好難遷就時間，就得你一、兩次，第三次已經未必預你，所以舊朋友可能難以維繫，新朋友更加識唔到！

家庭聚會永遠Absent

大時大節，聖誕、新年總係不見蹤影，又或者用盡九牛二虎之力同人調更，欠下一身人情債先得，想享受天倫之樂都要用盡方法，慘呀！

放假無嘢做

你返工人哋放假，到你自己放假人哋就返工，想約朋友親人咩，邊有人得閒，想出街玩，啲節目又通常喺節日或者周末先出現。唯一開心係唔會要同人迫囉。

容易抑鬱

有研究顯示返夜更嘅人由於接觸陽光嘅時間少，非常之容易患上抑鬱或其他情緒病；而且在日頭時候瞓覺，始終比夜晚瞓嘅質素差。

進修困難

大部分進修課程都係放工時間，除非你Quit咗份工，否則邊有可能去到上堂呢？

食無定時

返Shift影響生理時鐘，連食飯時間亦隨時被打亂，除非可以嚴格控制自己，否則有機會一日到黑都係不停食，因為根本唔知自己應該幾時食飯！