連詩雅為欠租事件澄清

近日，連詩雅（Shiga）被傳做「租霸」冇交租3個月，更欠下超過10萬元租金。報道出街後，令唔少Shiga嘅家人、朋友、同埋粉絲都好擔心。喺今日佢就接受傳媒訪問為事件澄清並強調自己冇拖欠租金，同時佢亦承認有處理得唔好嘅地方，就係上一個租約完咗之後，佢一路冇簽新租約，但係同業主係一個友好關係，互相信任大家，同時亦強調每月都準時交租。

Shiga亦解釋點解冇處理租約問題，佢就話其實一直有搬嘅意願，不過工作真係太忙同埋搵屋唔係一件簡單嘅事，所以一直冇處理。不過因為近日嘅報道，Shiga已經同業主簽咗新嘅租約。同時，Shiga仲話業主好擔心佢，問有咩可以幫到佢，經過雙方同意後，業主就拍咗條片，幫佢澄清冇欠租金。喺錄音片段中，有一名自稱係業主嘅男子為Shiga澄清事件就話佢冇拖欠租金，佢哋好準時交租，除非出外。至於冇合約，業主亦都承認係冇簽，因為大家信任，所以喺合約期滿後都冇簽約，不過因為今次事件，佢哋補簽返合約。至於拖欠租金一事，佢就話係謠傳。

之後，Shiga就拎咗張臨時租約出嚟證明自己冇拖欠租金，仲堅稱財政及生活都無問題，依家生活得好開心，亦都會繼續努力工作。

喺訪問中，Shiga同時亦表示唔認識陳先生及澄清租住上址係由自己公司去租，完全冇涉及第三者，之後佢仲拎出一張證明文件為事件澄清。

另外，有報道指Shiga媽咪俾人喺九龍塘火車站貼大字報，話佢媽咪涉非法集資同非法轉移財產。Shiga亦喺訪問中回應事件，佢話以佢了解，今次事件係因為佢媽咪同工作夥伴喺工作上產生誤會而搞出嚟嘅惡作劇，就呢件事佢媽咪會交俾警方處理。Shiga仲話平時唔係太清楚媽咪嘅工作狀況，不過佢做啲咩，佢都會100%支持佢。同埋話媽咪已經係一個70歲嘅婆婆又唔係藝人，希望大家可以高抬貴手，俾時間同空間佢去解決今次嘅問題。Shiga仲話今次被指拖欠租金嘅事同媽咪被貼街招事件係完全冇關聯喎。