鄭中基因騷後有陌生面孔推撞 以保障粉絲安全理由取消見面活動

鄭中基（Ronald）相隔5年再喺紅館舉行個唱，6場《Fragments of Wonder 鄭中基世界巡迴演唱會2024—香港站》將於今晚（19日）舉行尾場，吸引一班粉絲入場支持。喺前日（17日）完成第四場後，錫粉絲嘅鄭中基好貼心咁為場館外等候嘅粉絲見面及簽名，不過去到噚日佢就突然發聲明宣布決定取消騷後見面活動。

噚日，鄭中基喺社交網站發聲明，表示因完騷後多咗陌生的臉孔、無禮行為及粗暴推撞越嚟越嚴重，為保障粉絲安全及鼓勵觀眾觀看整場演出，所以決定取消騷後見面活動：「有關粉絲於閘外等候簽名見面事宜 在每一場演唱會完結後，都有為數不少的粉絲於場館停車場圍欄外等候我離場。由於很多粉絲可能遠道而來又或者支持了我很久，因此我也很珍惜與他們會面的機會。在能力範圍內，盡量為他們簽名及見面。在過往幾場的演唱會後，發現閘外的人除了多了陌生的臉孔外，無禮的行為以及粗暴的推撞越趨嚴重。昨天經過口頭勸喻後亦無改善。甚至有工作人員發現現場人士將面見的過程直播衝流量。亦有現場觀眾反映，部份觀眾甚至提早離場於閘外霸位。有見及此，為了保障所有粉絲的人身安全，以及鼓勵觀眾觀看整場演出。我們決定取消一切於閘外的簽名及面見活動。作出這個決定對我們來說也不容易，但畢竟人身安全最為重要，希望各位見諒。」

此聲明一出，唔少粉絲都紛紛留言表示支持，例如「大佬好嘢 睇咗三個鐘，乜都夠晒啦」、「Great 安全最重要…」、「支持大佬既做法」、「與其畀人搞破壞不如決斷一刀切，有心嘅點都會大把機會見面」、「支持大佬決定」、「大佬好嘢 果個位人太多都好危險及阻到人過馬路」、「贊成！拒絕無禮與粗暴！大佬加油！」、「支持，安全要緊，support 大佬！！」、「問人攞簽名，唔該，客氣啲，唔係奉旨應份的。」、「果然係大佬，顧及粉絲嘅安全」及「支持 錫fans 係正常 但唔係老逢」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！