阮嘉敏告別《東張西望》 接受新挑戰做直播主持兼拍劇

阮嘉敏（Mandy）喺2017年開始擔任《東張西望》外景主持，憑著性感小背心去大埔梧桐寨瀑布採訪及智慧擊倒噪音屯門公園無牌表演大叔，成功獲得網民關注，成為「東張女神」之一。不過佢喺今年5月初離開《東張西望》節目組，接拍劇集《靈戲逼人》及為《鄰住買》擔任直播主持。

接受傳媒訪問時，阮嘉敏就表示做咗五年《東張西望》真係唔捨得，不過大家喺同一間公司都會碰面。佢仲話最難忘係採訪屯門阿叔，而家佢每次經過屯門都會諗起佢。佢認為當時自己認真工作，而家睇返就覺得好好笑，自覺自己問得唔錯。另外，佢仲話過去5年喺《東張西望》建立咗自信心，仲話自嗰時開始佢嘅手提電話就使用響鬧功能，可以隨時隨地On Call，並試過收通知後即刻執行李去台灣公幹。

阮嘉敏坦言《東張西望》令佢成長好多，令佢發現努力係無止境，及只要堅持做一件事，就真係會做到。被問到工作壓力時，Mandy就話任何行業都會承受壓力，而佢嘅減壓方法就係做自己鍾意嘅嘢，例如彈琴、運動、睇笑片等等。離開《東張西望》後，阮嘉敏為《鄰住買》擔任直播主持已經兩個月，最近仲為劇集《靈戲逼人》拍攝。

現年31歲嘅阮嘉敏，2016年落選香港小姐後加入無綫，之後入讀藝員訓練班。2017年開始擔任《東張西望》外景主持及為其他綜藝節目演出，例如《姊妹淘》及《3日2日》等等。另外，佢亦參與劇集拍攝，不過都係飾演一啲唔起眼嘅角色，例如《踩過界》、《誇時代》及《逆緣》等等。最近佢接拍劇集《靈戲逼人》，戲份比以前多。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！