陳嘉慧校園獻初吻 願望成真

無綫力捧新女陳嘉慧於生日獻上螢幕初吻給胡鴻鈞，從前讀女校的她，笑言於校園發生這些戀事是她夢寐以求的，如今彌補了學生年代的空白，感覺好正。

唱得又演得的藝人胡鴻鈞（Hubert）之前奪得《勁歌金曲頒獎禮》的最受歡迎男歌星後，除了不斷推出新歌外，更一劇接一劇，現時他正與新人陳嘉慧（Erica）合作拍攝無綫新劇《愛上我的衰神》。日前，他們到校園拍攝，當日恰巧是Erica的25歲生日，劇組準備了生日蛋糕為她慶祝，Hubert做代表唱住歌送上蛋糕，Erica接受娛樂新聞台訪問時坦言感覺「好正」。

Hubert平時鍾意整蠱人，不過說到Erica的工作表現，就即刻轉正經Mode有讚冇彈，他說：「佢係好勤力嘅女仔，唔似係一個資歷好淺嘅演員，拍攝前佢做好多功課，希望到時播出大家都見到我哋嘅火花。」

拍攝前保持距離

二人當日於校園除了情侶互動場口外，還有親吻戲，Erica獻出螢幕初吻，幸好他們集中精神拍攝，過程相當順利，Hubert又說：「因為佢係一個好識搞氣氛嘅人，所以為咗培養情緒，我拍攝前都要同佢保持距離。」Erica於日本求學時就讀女校，所以今次於校園跟男仔發生這些「情事」，笑言好難得：「有啲談情說愛嘅嘢都係我夢寐以求嘅，依家終於實現咗喇！」Hubert以前讀男校，重返校園沒有浪漫回憶，只想起跟同學仔打波的畫面。