陳山聰講同伍詠薇「復合」過程︰有啲錯唔應該再犯 露股戲親身上陣因為「夠大」

《金宵大廈2》雖然收視未見驚喜，但係口碑同迴響唔錯，男主角陳山聰接受YAHOO TV訪問，被問到邊個單元最好睇，佢嘅心水推介正係而家出緊街嘅OPPA，認為拍出來個效果比起劇本有驚喜，而且好有時代氣息。另一個心水就係伍詠薇主演嘅《雙魚》，一來係「家姐」演出，二來伍姑娘戲外唔止為角色減磅，甚至係唔食飯唔飲水，令自己青筋暴現，配合角色性格。

講起伍姑娘，好難唔回帶提起一度情同姊弟嘅陳山聰同伍詠薇，當年因為誤會而決裂嘅事。山聰多年後講返，有次飲酒玩Truth or Dare輸咗，要打電話同伍詠薇講「以後唔好再搵我」，伍詠薇回佢「好呀」就收線，繼而喺微博公開要絕交，結果全世界都知。因為當年陳山聰同何超雲拍拖，事件就更見耐人尋味。

今次山聰都有講起「復合」過程︰絕交6年後，有次山聰夫婦去日本旅行，喺香港機場遇上都係去東京嘅伍姑娘伉儷，尷尷尬尬問候下就算，仲要驚會喺貴賓廳又碰面。去到日本，有晚山聰太太問老公會唔會約伍姑娘食飯，山聰叮一聲覺得可以，於是send短訊俾伍姑娘老公練海棠。點知覆message嘅係伍姑娘，仲要好開心咁話ok。到見面一刻，兩姊弟一個擁抱，立即咩誤會都煙消雲散。山聰話原來同伍姑娘和好係期待已久嘅事，亦覺得呢段關係唔可以再甩，因為「有啲錯唔應該再犯」。

而伍詠薇喺山聰婚禮上遇到《金宵大廈》監製葉鎮輝，盛讚劇集好睇，仲自薦有續集預埋佢，因此造就伍詠薇回巢TVB。

訪問中山聰亦有提到劇中「露股」演出一幕，原來係佢自告奮勇要親身上陣！山聰話睇劇本見到有呢場戲，即刻打電話搵監製，對方叫佢睇晒20集劇本再傾。睇完，山聰明白全裸戲同劇中Maurice 以及Joey嘅角色身世有關，於是同監製表明要親自露股唔用替身，因為山聰自言「替身邊有我蘿柚咁大」！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！