陳自瑤張達倫談情 咀完要補妝

東方日報
·2 分鐘文章
2人於《大》劇激咀連場。
2人於《大》劇激咀連場。

陳自瑤與張達倫於熱播劇有多場激咀戲,女方笑言對達倫感覺陌生,反而能夠投入演出,更被對方錫到嘴都紅晒,每次拍完都要補妝。

「索爆人妻」陳自瑤(YoYo)狀態愈來愈好,不時於社交網上載靚相,發放正能量,獲不少網民力撐。她於無綫熱播劇《大步走》中,與飾演攝影師的張達倫相遇後擦出愛火,之後男方失明,有幸得伊人陪伴渡過難關。

利用陌生感覺

入行多年的2人首度合作,當中不乏親熱場面。YoYo受訪時坦言之前與達倫不認識:「今次同佢好多感情戲,初頭都擔心會唔會感覺唔舒服呢?最後我利用呢種陌生感覺嚟演,出嚟效果好特別。」又指劇中跟達倫由偶遇、相識然後相愛,戲裏戲外都是由零開始:「因為我最初同佢唔熟,拍攝時佢每一個表情、每一句對白,對我嚟講都好似佢真人一樣,令我好容易投入角色。當然都要達倫人品好又專業,佢好顧及對手感受。」

演失明角色的達倫,被問是否用「聲」與YoYo談情,他笑言:「我哋何止用聲去談情,直頭用嘴去談情!有一場戲仲要係激咀,嗰陣個角色要留鬚,拍完後,YoYo個嘴畀我搞到紅晒,每拍完一個Shot,佢都要補妝,真係辛苦晒佢!」

蒙眼體驗失明

他表示拍攝前為角色做了不少準備:「盲嘅戲份有3分之1,唔算太困難,拍之前我試過喺屋企蒙住自己對眼生活體驗吓,得閒就訓練,攞個感覺,原來自己集中力都幾好,我有研究失明嘅人點用拐杖,坐櫈之前又會有咩動作,入戲之後,就算人哋喺我面前點郁我都冇反應。」