陳詩欣愛玩神秘嫁6號「止痕」

無綫主持陸浩明（6號）的Model女友陳詩欣（Ayan）外貌甜美，其社交平台追隨粉絲極多，如今被6號私有化，難怪不少男生都相當「葡萄」！

陳詩欣煮得一手好菜，擅長整甜品，曾在聖誕節和情人節為男友做薑餅人和「心太軟」甜品，6號大讚有水準，更甜到入心入肺。最近Ayan學做花式蛋糕，用了英文名的A字做餅模，並以馬卡龍、士多啤梨和玫瑰花做裝飾，靚到令人唔捨得食！冧到男友不特止，好學的她更向難度挑戰，準備報讀甜品藍帶課程，希望獲得專業認可證書，然後做網上甜品生意，終極目標是開實體Cafe！

買到愛巢就成事

6號與Ayan拍拖7年，常被合作主持無綫節目《食平D》系列的肥媽催婚，所以兩人亦開始有計劃。6號曾多次表示成功置業就會落實結婚計劃，但原來Ayan還有一個要求，就是要有驚喜求婚：「肥媽係成日催婚，但男友冇乜同我講，可能會畀驚喜我。始終結婚係人生大事，如果落實後應該一齊搞，有商有量嘛，但求婚就要有驚喜好啲，最好事前唔好畀我知！（屋企人有冇催婚？）兩邊家人都冇催。」

讚男友值95分

問到兩人可有7年之癢？Ayan即笑說：「冇，可能痕就係踏入結婚呢個階段！（咁多年有咩相處之道？）男友脾氣好好，男仔好少有，佢遷就到我，講嘢又叻，我未發忟憎已經畀佢緩和咗氣氛。（咁好嘅男友值幾多分？）95分啦！唔可以太高，要有進步空間。」

Profile

年齡：26歲

身高：1米73

三圍：31B、23、34

腿長：43吋

嗜好：煮甜品、做小手工