【電影LOL】《屍殺列車》續集《屍殺半島》下周上畫 5個你要知嘅重要訊息

·3 分鐘文章

今個月最有機會幫補各戲院票房嘅,一定係15日上映、香港勁收6800萬嘅《屍殺列車》續集《屍殺半島》!上集講到列車駛往釜山後,喪屍病毒瞬間全國爆發,4年後的韓國屍毒大流行,被全球孤立,淪為死城。

今集雖然換哂人,不過製作規模大咗幾倍,用咗1600萬美元拍攝,睇預告片都見到今集簡直係喪屍放題!今日先同大家預告下《屍殺半島》有咩值得留意。

1。今集打打打

唔似上集只能埋身肉搏對付喪屍,今集為咗求生逃命,出現大量飛車、機關槍開唔停及爆破場面,連導演延尚昊都話今集少咗社會百態,多咗動作元素。《屍殺半島》唔止係喪屍片,更加似後末日災難片,身處一個瘋狂又無法紀嘅世界,所以有向同類型電影《活死人地帶》、《末日戰車》等取經。

2。敵人唔止喪屍

從預告片中睇到,未受屍毒感染嘅人類苦苦掙扎求存,一方面受喪屍襲撃威脅,另一方面亦受人威脅同欺壓,被捉去同喪屍打鬥作為賭局。末日之時,有人盡情使壞,男主角正錫(姜棟元 飾)亦因為受到白眼才決定放手一搏,返回韓國竊取巨額美金以賺取高額酬勞。

3。細路好打得

還好,世界再壞都仲有好人,姜棟元都係得到倖存者嘅幫助,先從屍口逃出,再決定幫助島上倖存者逃生。上集主角碩宇(孔劉飾)個女一直備受保護,《屍殺半島》嘅細路就唔一樣,受環境影響,小小年紀有膽識,飛車技術一流,仲好有腦咁識製造掩眼法引開班喪屍,有勇有謀過班成年人!

4。港味場景 香港就係「屍殺半島」?

今次香港於《屍殺半島》佔一席位,戲內出現熟悉嘅街景同茶餐廳。不過片名嘅《半島》唔係指香港,而係指當時政治體瓦解,再無分南北韓,國不成國,無咗身份只剩「半島」。

5。《屍殺列車》加長版趁機放映 幫戲迷溫書

話明係續集,無咗孔劉,故事角色又同上集無關聯,好似講唔過去,加落《屍殺半島》又好似太冗長。導演及片商諗出條好橋,就係趁機上映《屍殺列車》加長版,重溫4年前喪屍病毒如何蔓延韓國,兼再睇孔劉、馬東石有幾man外,最重要係暗藏《屍殺半島》劇情線索!

咁有橋,抵《屍殺列車》全球票房大收。期待《屍殺半島》一樣咁精采!

更多電影文章

【電影LOL】《末日先鋒:戰甲飛車》拍前傳 影后主角被飛起 因為扮唔到20歲女?

【電影LOL】0成本勇奪全美票房冠軍 呢套Unsubscribe原來係咁拍!

【電影LOL.外語930】逃亡教學指南 《Argo救參任務》

【電影LOL】今個星期睇咩戲 《幻愛》《無名勳章》《惡‧迴家》《緣來客運站》《這一刻,想見你》

【電影LOL】《幻愛》 談一場疑幻似真嘅愛情