露口風 追多個 林峯跨台造勢 唔怕無綫嬲

藝人林峯昨日首次踏足ViuTV宣傳新歌，今日則按計劃現身無綫錄影，實行左右逢源！談到歲半囡囡，他即一面慈父相，不排除再「追」的可能。

林峯直言首次參與ViuTV節目《CHILL CLUB》演出感覺新鮮，談到宣傳與好拍檔鄧智偉合作的新歌《幼稚未完》，他說：「幾開心隻歌上咗幾個音樂榜，加上依家疫情打亂影視工作安排，我咪做多啲音樂方面嘅工作先囉！」

專注湊「好」字

問到可擔心無綫「呷醋」，他說：「我係以華納歌手嘅身份亮相音樂節目，況且我聽日（即今日）都錄影《勁歌金曲》。」他直言與無綫已沒有任何合約關係。而他主演劇集《黑金風暴》亦將於有線播放，問他會否亮相所有香港電視台來個「大滿貫」，其經理人即表示「度吓期先」。至於影視工作安排，問林峯接下來是否參演英皇電影《黑幕》，與郭富城及任達華等合作，他說：「經理人同電影公司方面傾緊，仲未落實，主要係因為疫情影響工作安排。」

談到歲半囡囡，林峯即笑不攏嘴，並說：「佢多嘢講，講埋啲BB話，好彩疫情下留喺佢身邊，如果唔係錯過好多成長印記。（讀書方面點安排？）舊年已經填咗好多表格，幫佢分別報讀內地、香港嘅學前班同幼稚園，不過疫情關係學校閂晒門，唯有暫時留喺屋企教學。（帶佢去行山？）係呀，因為屋企附近有（山），抖吓氣都要，最緊要唔好人群聚集。（追多個B？）順其自然，不過都想追多個陪佢。追到個『好』字梗係好，但如果再多個妹妹都OK。」