靈戲逼人︳嫲嫲曾向監製sell乖孫 阮浩棕︰做梁舜燕個孫 壓力多過好處

TVB劇《靈戲逼人》帶起一班年青新面孔，其中一個係劇中演謝雪心徒弟阮浩棕(Nicholas)。生面口有新鮮感，但原來阮浩棕入行已經10年，中間仲一度離巢北上外闖過。

阮浩棕更為人知嘅身份，應該係佢同梁舜燕嘅祖孫關係，而佢二叔（阮惠熊）、姑媽（阮曼莉）、哥哥阮浩鋒都係演員。話晒都係「星三代」，但Nicholas都做過唔少路人甲乙丙角色。阮浩棕接受Yahoo TV《娛樂訪談》訪問時，直言「梁舜燕個孫」對事業發展幫助唔大，但又唔係完全冇好處。阮浩棕知道嫲嫲曾經向TVB監製sell乖孫，有時真係得到機會，但Nicholas回想當時初入行未準備好，機會只得一次，所以令佢覺得即使家人都係圈中人，其實係有壓力多過有好處。

阮浩棕曾經北上發展2年幾，最大得著可能係唔再驚吊威也。喺內地，阮浩棕試過要演俾對手由高處拉落嚟嘅戲份，成個人仲要大字形趴落地，真拍嘅時候地下係冇鋪榻榻米，即係要「硬食」。拍完呢場戲，阮浩棕未醫好「威也恐懼症」，但起碼有改善。

今年阮浩棕已經有3套劇出街，起碼唔再係跑龍套，另外仲有2套拍好1套開緊，似乎可以排隊等「飛躍進步」獎啦喎。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！