《香港愛情故事》今首播 羅天宇入行12年擔正做男一

ViuTV大型選秀節目《全民造星III》成為全城熱話，相反無綫嘅《阿爺廚房》就好似隱咗形咁，提都冇人提。今晚《全民造星III》將會公布A3組與B2組嘅對決賽果，而無綫就由以往3線劇集變4線劇集，臨時變陣改播愛情小品劇《香港愛情故事》，劇集由羅天宇、龔嘉欣、王敏奕、謝東閔、龔恩慈及白彪等人主演，劇情主要講述老中青三代人嘅愛情故事，當中圍繞唔少人需要面對嘅問題，例如搵地方「開房」、為上車死慳死抵、離婚爭公屋、被迫住劏房等等，絕對係一個只有香港人先有共鳴嘅劇集。

《香港愛情故事》男主角人選曾一改再改，由張振朗轉楊明再轉做羅天宇。今次係羅天宇入行12年首次擔正做男一，佢係劇中飾演暖男設計師陳子朗Ronny，與龔嘉欣有唔少親熱鏡頭。另外，佢仲要半裸晒肌及除褲露股，同之前演嘅角色完全唔同，好有發揮，相信會俾到驚喜觀眾啦！

2008年參加香港先生獲得少年組冠軍嘅羅天宇，入行後獲得唔少演出機會，不過都係飾演配角居多，直至2012年憑處境劇《愛·回家》 飾演馬子仁一角為觀眾熟悉，入屋成功。除咗《愛·回家》馬子仁同《跳躍生命線》譚家俊之外，佢都未有其他代表作，有傳羅媽媽見到呢個情況後，即刻為個仔打盡人情牌，而成功執三攤獲得今次男一機會。再加上羅天宇緋聞女友戴祖儀極速上位，羅媽媽唔想佢哋距離愈嚟愈遠，所以出手幫忙。至於感情方面，羅天宇嘅感情生活相當精彩，除咗同林芊妤（Coffee）、苟芸慧及湯洛雯拍過拖之外，佢亦同陳瀅、蔣家旻、戴祖儀及蘇皓兒等傳過緋聞，位位都係「女神級」靚女演員，難怪佢有「女神收割機」呢個稱號呀！

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！