[綠葉出頭時] 《寒山潛龍》配角搶戲過主角

《寒山潛龍》出promo嗰時，睇落似《回到三國》又似《少年四大名捕》，捉唔到路係正劇定喜劇，令人諗起舊年年度膠劇《神探高倫布》，聞到都覺得有伏味。到近期大家開始對套劇改觀，覺得劇情輕鬆，對白搞笑，節奏明快，除咗主角馬國明、李詩韻、敖嘉年、林夏薇嘅功勞之外，當然唔少得一班配角啦！

1. 曹永廉 飾演熊十九
識睇一定係睇熊十九，喜感十足嘅曹永廉可以話係全劇最搶戲嘅一個。尤其係佢見到舊情人小雪個表情，真係好搞笑呀！亦有唔少網民大讚殺手陳環（「撒手塵寰」）呢個gag有創意。

2. 羅樂林 飾演熊峰
熊氏父子搶鏡程度真係無得輸！身為聚龍幫幫主嘅羅樂林同佢個仔曹永廉有唔少對手戲，其中有一幕熊十九連五石散同硫磺都唔識分，仲話想一把火燒啲硫磺，熊峰就話：「你一點火阿爹死得仲快！」，呢一幕就引起網民熱烈討論。話時話，唔知今套劇羅樂林可唔可以逃離到必死嘅命運呢?

3. 陳國邦 飾演馬川芎
由12年《大太監》嘅彭三順去到三歲識把脈、十歲識製藥嘅天璣府校尉馬川芎，陳國邦嘅演技毋庸置疑。

4. 劉江 飾演鳳南天
天璣府由劉江飾演嘅鳳南天為首，率領一班名捕專責處理奇案。劉江有一幕令觀眾留下深刻印象，就係明明只係生痔瘡，但係講到好似就快會死咁，劉江老師嘅演技真係要認真有認真，要搞笑有搞笑，應該可以CAP到張圖承接「講呢啲」嘅聲勢。

5. 張慧雯 飾演關超／馬雲苓
佢係邊個？就係《On Call 36小時》入面飾演晶晶果個實習醫生呀！雖然演技仲幾幼嫩，但都有唔少網民讚佢演得夠放。劇集開頭以老千(關超)出現，去唔同嘅賭坊呃人，但最後被馬川芎識破。最近仲同馬川芎相認，原來係佢失散多年嘅細妹(馬雲苓)。究竟馬雲苓同馬川芎係唔係真係親生兄妹？睇落自有分曉。

圖片：TVB截圖